Nalutsan og warrant of arrest ang konsehal sa barangay Bogo, Lungsod sa Argao niadtong Lunes, Nobiyembre 14, 2022 kay wa nakaduso sa iyang Statement of Assets, Liabilities and Networth (SALN).
Si Danilo Gealon Felomino, 54, incumbent councilor sa Brgy. Bogo, Argao, gidakop nila ni Police Major Nazarino Emia, hepe sa Criminal Investigation and Detection Group (CIDG)-Cebu Provincial Field Unit (PFU) uban sa mga sakop sa Argao Police Station.
Butyag ni Emia sa dihang nahinabi sa Superbalita Cebu nga si Felomino nasikop pinasikad sa warrant of arrest sa kalapasan sa Republic Act 6713 kun Code of Conduct and Ethical Standards for Public Officials and Employees.
Ang warrant giluwatan ni Judge Leonardo Peque Carreon sa Branch 56 sa Municipal Trial Court (MTC) Argao, Cebu, gipitsahan og Nobiyembre 14, 2022 nga dunay piyansa nga P30,000 alang sa iyang temporaryong kagawasan.
Matud ni Emia, nga sa ilang nakuhang impormasyon ang complainant usa ka Annade Bedolido Davin, hingkod, treasurer sa Brgy. Bogo.
Ang kaso giduso sa buhatan sa Ombudsman gumikan sa kapakyas sa konsehal pagsumiter sa SALN niadtong Hunyo 2021.
Sumala ni Emia nga na released na ang konsehal sa Martes human nakapiyansa.