Bucao mopahawa sa Talisay kon dili mapili pagka mayor?

ANDAM mobiya sa pagka residente sa dakbayan sa Talisay si Bise Mayor Alan Bucao kon siya dili mapili nga mayor sa eleksiyon sa Mayo 9, 2022.

Usa kini sa giluwatang pamahayag ni Bucao atol sa programa nga Andiscoveries sa MyTV Cebu niadto pang Marso 23, 2022 apan napasa-pasa nga interview sa Facebook.

Matud ni Bucao, siya ang katapusang tawo nga mobarug alang sa mga Talisaynon.

“If ever di ko tagaan og higayon sa akong mga igsuong Talisaynon definitely mobiya na ko sa Talisay. As a resident,” asoy pa niya.

Iyang gitug-an nga kon politiko gani, bisan og wa na ka sa posisyon, anhaon gihapon ka sa mga tawo nga mangayo og tabang.

“Kay mosugot ka ug sa dili, politiko gani ka bisag wa na ka sa imong pagkapolitiko inig human sa eleksyon, anhaon gyud ka,” matud pa ni Bucao.

Si Bucao nagdako sa Barangay Day-as, dakbayan sa Sugbo.

Gani siya nahimong lider sa kabataan niadtong 1976.

Nibalhin siya sa Talisay ug didto nagpapili sab isip opisyal sa gobiyerno.