MIPASANGIL si Lapu-Lapu City Mayor Junard “Ahong” Chan sa Konseho sa dakbayan nga gilangay-langay ang P83 milyones nga supplemental budget alang sa Covid response sa dakbayan.
Sumala sa mayor wala pa kini maaprobahi sa Konseho human sa tulo ka mga session.
Gipasabot ni Chan nga importante ang budget sanglit mao kini ang kuhaan sa kagamhanan sa mga pagkaon sa mga frontliner ug ingon man sa mga Oponganon nga ipaubos sa isolation ug quarantine.
Gibana-bana ni Chan nga hangtod na lang sa Biyernes, Septiyembre 10, ang budget sa pagkaon sa mga frontliner.
Human niini, wala na siya masayod og asa mokuha pagbalik og pundo.
Anaa usab sa supplemental budget ang gahin alang sa burial assistance sa mga nangamatay niining panahon sa pandemya.
Alang sa mayor, nasagolan na usab kini og pulitika.
“Akong gipanawagan ngadto sa mga Konsehal, ihikling nato ning atong pamulitika. Ang atong unahon trabaho sa ta sa mga nanginahanglan. Kon ang gipangayo kay naa pa kuno silay gipangayo voucher, pwede nila tawgon atong accounting department kay naa raman na, tua na sa COA,” matod ni Chan.
KWENTADA
Si Konsehal Flaviano “Bobit” Hiyas, chairman sa committtee on finance sa Konseho sa iyang bahin, nipasabot nga ila na nga naaprobar ang Annual Investment Plan (AIP) sa P83 milyones nga Supplemental Budget 3 (SB3) sa miagi nilang session.
Mosunod na niini ang pagpalusot na sa kwarta sa SB 3.
Apan gipasabot sa konsehal nga mahitabo lang kini kon makapakita og liquidation ang Kagamhanan sa ilang nagasto sa Covid response sukad sa pagsugod sa 2021 sama sa mga voucher.
Kini aron masayod ang katawhan kon asa gigamit ang kwarta sa gobyerno.
Dili maayo, sumala pa ni Hiyas, nga magsige na lang sila og aprobar og pundo ug gahin ang Konseho nga wala gani masayod asa na ang maong mga kwarta.
“Sayon ra kaayo pag-ingon nga naa diri ang kwarta, naa didto. Pero naa bay justification? Naa bay ebidensya? Makita na sa voucher. Mao na kay daghan ko’g nadawat nga report nga funds were not properly managed. So ang ato maklaro lang ipakita mayor og asa ang kwarta,” matod ni Hiyas.
Mayoriya sa mga sakop sa Konseho ang oposisyon nga kaalyado ni Kongresista Paz Radaza.