Nagkawilkawil ang bukton sa mag-uuma human gitigbas og sanggot sa iyang silingan, alas 8:00 sa gabii sa Martes, Hulyo 11, 2023, sa Barangay Ubaub, lungsod sa Argao, habagatang Sugbo.
Si Romando Montejo, hingkod, nagpuyo sa nahisgutang dapit, hapit maputli sa iyang wala nga bukton dihang gidala sa Vicente Sotto Memorial Medical Center (VSMMC) sa dakbayan sa Sugbo.
Ang suspek nga nasikop mao si Johny Boy Epugon, 22, ulitawo, mag-uuma usab nga silingan sa biktima.
Si Major Ivy Bartolome, hepe sa Argao Police Station nga nahinabi Superbalita Cebu, nagkanayon nga nag-inom ang biktima uban sa suspek sa panimalay sa ilang silingan.
Giimbetar silang duha sa ilang silingan sa salo-salo tungod sa paggradwar sa anak niini.
Human nila nahurot pagtagay ang duha ka galon nga bahalina, nagkalalis ang biktima ug suspek nga nisangko sa pagpanigbas.
Matod pa, ang biktima nagmaoy sa miaging buwan hinungdan nga gigukod niya og sundang ang suspek.
Sa kalagot sa suspek nga gihisgutan og balik sa biktima, nipauli kini apan nibalik nga nagdala na og sanggot dayong panigbas. (GPL)