GIAPROBAHAN na sa konseho ang ordinansahon nga maghimo sa business permit nga balido sulod sa duha ka tuig inay sa naandan nga 12 ka buwan.
Ang ordinansa ni Konsehal Raymond Garcia, kinsa maoy majority floor leader sa Konseho, maoy tubag sa campaign promise ni Mayor Edgardo Labella atol sa niaging piniliay para di na mahasol paglinya matag tuig ang mga negusyante sa pag-renew sa ilang Mayor’s Business Permit.
Apan sa wa pa uyoni sa Konseho ang maong ordinansa, katulo una kini gihikling sanglit gusto sa mga konsehal nga ilang matun-an og maayo ang ordinansahon ni Garcia nga gisuportahan sa Cebu City Chamber of Commerce and Industry. Ang ordinansa maoy nag-amendar Section 7 sa City Tax Ordinance NO. LXIX entitled” An ordinance revising the city tax ordinance No. 1, otherwise know as the Omnibus Tax Ordinance of the City of Cebu.”
Si Garcia nipasabot nga human sa approval sa Konseho, iduso kini sa Secretariat sa Sangguniang Panlungsod sa Office of the Mayor para sa signature ni Labella sa di pa buhatan og implementing rules and regulation (IRR).
Ang konsehal sa north district nagkanayon nga sa higayon nga mapatuman na kini sa mayor, ka usa na lang mag-renew ang mga business owner sa ilang Mayor’s Business Permit sa duha ka tuig. (PAC)