MOABOT ngadto sa P250,000 ang balor sa mga gamit sa butane canister refiling station ang nasakmit sa mga sakop sa Mabolo Police Station sa sitio Lower Laguerta, Barangay Busay, Siyudad sa Sugbo, Biyernes sa kaadlawon, Abril 5.
Nasikop ang pag-umangkon sa tag-iya lakip na ang nagbantay sa refiling station nga giila nga silang Luis Guyja Casagan, 56, ug Johnny Gonzalgo, 24, taga Jimalalud, Negros Oriental.
Nasakmit sa mga sakop sa Mabolo Police Station ang 13 ka liquefied petroleum gas (LPG) tanks nga puno pa sa LPG, upat ka empty LPG tanks, 35 ka butane canisters nga adunay sulod nga LPG, 1,570 ka empty canisters ug tulo ka burners.
Matod ni Police Major Dindo Alaras, hepe sa Mabolo police station, naabtan pa sila si Casagan ug Gonzalgo nga nag refill sa mga butane canister hinungdan nga ila dayon nga giepekto ang pagdakop ug pagsakmit sa ilang mga gamit.
“In response ni sa complaint sa mga silingan mao nang niadto ta. Pag-abot didto klaro kaayo ilang refiling station in plain view, ato dayon gidakop ang mga tawo didto,” matod ni Alaras.
Wa una nganli ni Alaras kinsa ang tag-iya sa refilling station.
Alas 10 usab gahapon sa buntag, gironda sa Carbon police station ang laing butane refiling station sa Warwick Barracks, Barangay Ermita, Siyudad sa Sugbo.
Duha ang nasikop nga naatlan namaligya nga silang Sheba Secuya, 33, taga sitio Ermita proper, Barangay Ermita, kinsa nakuhaan og 44 ka butane canisters nga puno sa LPG ug 696 ka empty canisters; ug Celso Tabay, nakuhaan og 26 ka canisters nga aduna nay sulod ug 156 nga empty canisters. (AYB)