Gimandoan sa Office of the Ombudsman-Visayas si Land Transportation Office-Central Visayas (LTO 7) Director Victor Emmanuel Caindec ug usa ka doktor nga tubagon ang mga kasong falsification ug graft nga gipasaka batok kanila tungod sa giingong pag-isyu og “peke” nga student driver’s permit sa Bohol.
Sa duha ka pahina nga kamandoan nga giluwatan niadtong Enero 16, 2023, si Deputy Ombudsman for the Visayas Dante Vargas nimando kang Caindec ug Dr. Emmarielle Aniga Onez sa pagsumite sa ilang mga counter-affidavit mahitungod sa mga alegasyon nga gipasaka batok kanila sa reklamante nga si Doloreich Dumaluan.
Ang SunStar Cebu nisuway pagkuha sa habig ni Caindec bahin niini, apan matud niya nga dili siya moluwat og pamahayag hangtod nga dili siya makadawat og kopya sa maong order.
Si Dumaluan, kanhi mayor sa lungsod sa Panglao sa Bohol, nikiha kang Caindec ug Onez sa kasong graft and corruption ug falsification of public documents atubangan sa anti-graft office niadtong Septiyembre 2022.
Matud pa ni Dumaluan nga sila si Caindec ug Onez giingong nagkunsabo sa pag-isyu og peke nga medical certificate nga maoy gigamit nga rekisitos sa pag-isyu og student driver’s permits.
Si Dumaluan nipasangil nga ang mga aplikante gipangayoan og P700 ug giisyuhan og resibo nga rehistrado sa Bureau of Internal Revenue, nga gikonsiderar nga kalapasan sa National Internal Revenue Code of 1997. (JKV)