Gipaagi sa Facebook post ni Victor Caindec, regional director sa Land Transportation Office (LTO-7) ang pagpahibawo nga sugod kagahapon, Hunyo 20, 2023 mibiya na siya sa iyang katungdanan.
Kini human opisyal nga iya nang nadawat ang special order nga pinirmahan ni Department of Transportation (DOTR) Secretary Jaime Bautista nga aduna nay gitudlo nga officer in charge ang LTO-7 nga mao si Assistant Regional Director Glen Galario.
Sud sa lima ka tuig ug unom ka buwan nga pagpangatungdanan ni Caindec sa maong ahensiya, garbo niyang gipahibawo ang mga nahimong kalambuan ug kausaban sa sistema ug operasyon sa LTO, human siya gitudlo ni kanhi Presidente Rodrigo Duterte niadtong Enero 23, 2018.
Taliwala sa kontrobersiya ug saway batok sa maong buhatan, matod niya nga wa kini mahimong babag aron nga ipatuman niya ang mga kausaban human nga ang maong ahensiya gipasanginlan nga naputos sa kurapsiyon.
"I faced all of these with the belief that an inspiring leadership and faith in people to do good will achieve great things. I entered LTO7 with only a lawyer who advised me on legal matters, and no one else. I worked with the men and women of the agency and shared to them a vision of PRRD that could bring hope for all: an agency that would serve the people well," tipik sa mensahe ni Caindec.
KALAMPUSAN
Midoble ang gidaghanon sa LTO-7 satellite offices ngadto sa 36 gikan sa 18, gibuksan ang labing una ug dako nga licensing center sa SM Mall lukop nasod, labing dako nga district office sa Robinsons Galleria, pagtukod sa LTO Carcar office.
Gihatagan og kasayon ang publiko sa dihang gibuksan ang mga buhatan sa isla sa Camotes ug Bantayan, sa Dalaguete, Balamban ug Ronda, aduna say buhatan sa La Libertad, Negros Oriental ingon man ang pagdugang og buhatan sa Bohol nga nahimo nang upat ka opisina.
Ubos sa pagdumala ni Caindec, gipadagan ang ePatrol Team, usa ka LTO Mobile service nga nagserbisyo ngadto sa 60 ka LGUs ilabi na ngadto sa suok ug hilit nga mga dapit sa Cebu, Bohol ug Negros.
Samtang moabot ngadto sa 20,000 ang nakapahimulos sa Theoretical Driving Course Scholarship program sa LTO7.
Ang pagpalambo sa karaang buhatan sa N. Bacalso, Cebu City kun Malasakit Hub, ingon man ang LTO Subangdaku, Mandaue City.
"These little known facts are testament to how far LTO7 has transformed itself as a participant to nation-building. It is a performance-driven organization of people doing good public service work," saysay ni Caindec.
