Gimando ni Cebu Governor Gwendolyn Garcia ang temporaryong pagpahunong sa canyoneering activities sa lungsod sa Ginatilan ug Malabuyoc.
Kini subay sa uwahing lagda sa Executive Order (EO) No. 21 nga giluwatan ni Garcia sa Oktubre 10, 2023.
Matod ni Garcia nga lakip sa rason sa iyang mando ang risgo sa canyoneering activities gumikan sa mga taho nga wala ma-accredit nga operators ug wala ma trained nga tour guides.
Ingon man ang gikinahanglan nga pagpasar o pag-update sa bag-ong mga ordinansa ug lagda alang sa pag regulate sa kalihukan pagsiguro nga luwas ang mga turista nga mobisita.
“(This) is an urgent need to temporarily close and suspend canyoneering activities in these municipalities pending: (1) the required specialized training and accreditation for tour guides...” saysay sa EO 21.
“Any injury or mishap resulting from the gross neglect of the possible dangers that unqualified canyoneering tour guides may cause to the public would definitely adversely affect the tourism industry of Cebu,” dugang niini.
Ang maong mando gikinahanglan nga ipatuman hangtod modesisyon ang gobernador sa paglibkas.