Carbon vendor leaders nabalaka sa ‘amendments’ sa market code

File photo
File photo

Gisugdan na sa Cebu City Council ang pag-amendar sa Cebu City Market Code of 2017, nga gisang-at ni Konsehal Renato Osmeña Jr., kinsa maoy nangulo sa committee on markets.

Mokabat sa 5,000 ka vendors sa Carbon Public Market sa Barangay Ermita ang nabalaka sa gisugyot nga usbaw sa abang ug entrance fees sa merkado, ingon man ang plano nga tugotan ang pribadong entidad nga mokolekta sa mga bayrunon.

Ang mga lider sa mga asosasyon sa mga vendor ug uban pang mga hingtungdan nagpahayag sa ilang mga reserbasyon sa pipila nga mga gilatid sa gisugyot nga ordinansa sa publiko nga pagdungog atol sa regular nga sesyon sa konseho niadtong Miyerkules, Mayo 3, 2023.

Ang mga lider sa mga asosasyon sa mga vendor labi nga nabalaka bahin sa gisugyot nga usbaw sa abang ug bayad sa pagsulod sa merkado ug ang koleksyon sa bayad nga himuon sa Cebu2World Development, Inc. (C2W).

Si Winefredo Miro, presidente sa Ambulant Vendors Association ug vice chairman sa Carbohanong Alyansa, niingon nga sa higayon nga mosaka na ang mga bayronon, adunay domino effect nga makaapekto sa presyo sa mga palaliton nga gibaligya sa Carbon.

Ang Cebu Vendors Credit Cooperative vice chairperson Ma. Victoria Abellana niingon nga gusto sa iyang grupo nga magpabilin ang bayronon sa Carbon, apan kon kinahanglan kining usbawan, nihangyo siya sa konseho nga ipatuman na lang ang bag-ong rates kon mahuman na ang tibuok market redevelopment project.

“Okay lang kaysa di ta patindahon... di mi mosupak (pero) mohangyo lang mi nga sa pagkakaron, di lang sa increase-san mintras wa pa mi nahimutang,” matod ni Abellana.

Si Erwin Gok-ong, presidente sa Carbon Market Vendors Development Cooperative, nipalanog sa sentimento nilang Miro ug Abellana.

Si Ermita Barangay Captain Mark Miral, sa iyang bahin, niingon nga kinahanglan kanunay nga adunay konsultasyon kon aprobahan ba sa konseho o dili ang gisugyot nga ordinansa.

“Okay ra mangolekta ang Megawide, (pero) like increase of rentals, same gihapon, consultation gihapon ta kay mas nindot man gud kon ang gobyerno modala sa Carbon,” matod niya.

Si SunStar columnist Orlando Carvajal, kinsa tsirman sa Fellowship for Organizing Endeavors, non-governmental organization nga nalambigit sa community organizing, nagkanayon atol sa public hearing nga ang rebisyon sa City Market Code, “..unreasonably put Carbon market stakeholders, that’s all of us, at a great financial disadvantage.”

Ang sugyot nga rebisyon sa City Market Code gipasupot human ang siyudad mipirma og joint venture agreement (JVA) tali sa C2W.

Si Konsehal Rey Gealon nipasabot nga ang gisugyot nga mga amendment sa City Market Code gi-introduce aron magsilbi nga ancillary o suporta sa JVA diin ang siyudad “legally bound to comply with the terms and conditions.” (JJL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph