Namatay ang usa ka lalaki human pusila sa usa sa duha ka mga lalaki nga iya rang kaila sa Sitio Lower Tawog, Barangay Valladolid, dakbayan sa Carcar alas 8:50 sa Lunes sa buntag, Hulyo 31, 2023.
Ang biktima giila nga si Rogen Montefalcon Fajardo, hingkod, caretaker sa usa ka balay sa Valladolid, dakbayan sa Carcar, lumad nga taga Negros Occidental apan kasamtangan nga nagpuyo sa Brgy. Magkagong, lungsod sa Sibonga, habagatang Sugbo.
Ang igsuon ni Fajardo nga si Marvin niila sa mga suspek nga sila si Roy Bacus, construction worker, taga Negros Occidental, gitumbok nga gunman ug si Rodel Campaña, taga Valladolid ra sab.
Matod ni Police Lieutenant Colonel Mark Gifter Sucalit, hepe sa Carcar City Police Station, gipusil ni Bacus makaunom ka mga higayon ang biktima. Naigo ang walang bahin sa mata ug lawas ni Fajardo.
Dali nga gidala ang biktima sa Carcar Provincial Hospital apan gideklarar siya ni Dr. Adrian Gomez nga patay nang niabot.
Samtang ang mga suspek dali nga ningsibat sakay sa usa ka motorsiklo.
Sa manhunt operation, ilang nadakpan ang driver nga si Campaña lakip na ang motorsiklo nga gisakyan sa pagsibat samtang si Bacus gawasnon pa.
Giingong naglalis sila si Fajardo ug Bacus, dayon nikuha sa iyang armas ang suspek ug nipusil sa biktima makaunom ka mga higayon.
“Manag kaila rani sila nya nagkalalis. Wala pa ta kabalo unsay ilang gilalisan. Ang cause ra gyud ani ang personal nila nga away,” matod ni Sucalit. (AYB)