Ang Casa Blanca By The Sea Resort nga nahimutang sa Barangay San Vicente sa Isla sa Olango, dakbayan sa Lapu-Lapu pormal nga miabli sa ilang programa nga Casa Blanca Street Bazaar niadtong Hunyo 19, Sabado, niining tuiga.
Kini naglaum nga makahatag og trabaho ug dugang kita alang sa mga lumolupyo sa Isla sa Olango niining panahon sa pandemiya.
Gilangkuban ang maong street bazaar sa mga nagkalainlain nga mga manindahay gikan sa mga nagkadaiyang ka barangayan sa Isla sa Olango.
“Ako manghinaut nga kitang mga mamalitay, atua usab nga i-patronize ang mga baligya sa atong mga kaigsuonang Oponganon isip usab pagtabang kanila,” matod ni Konsehal Atty. Rex Mangubat, chairman sa committee on business and trade sa konseho sa siyudad sa Lapu-Lapu.
Aron maenganyo ang mga mamalitay, ang Casa Blanca Resort nipahigayon og Casa Blanca Bikini Bodies 2021 Elimination Round 2 diin sila si Jubilyn Sabino ug Aaron Miller ang ningdaug. (PR)