Ang Catholic Bishops Conference of the Philippines (CBCP) niadtong Biyernes, Hulyo 28, 2023, nisalikway sa tanang giplanong selebrasyon kalabot sa ika-75 nga anibersaryo sa giingong Lipa apparitions, nga nagkutlo sa kamandoan gikan mismo sa Vatican.
Sa iyang Circular No. 23-04, si CBCP President Bishop Pablo David niingon nga ilang gi-discourage ang tanang matang sa selebrasyon nga may kalabutan sa mga plano sa Confraternity of Mary Mediatrix of All Grace.
“Since Cardinal (Luis) Ladaria addressed it to my office as CBCP president, I presuppose that he expects me to communicate it, not just to the Archbishop of Lipa, but to the rest of you, our brother bishops in the CBCP, with the specific instruction that we dissuade any form of activity in view of the proposed celebration in Lipa,” matod ni David.
“I hope you can communicate this to the faithful in your own ecclesiastical jurisdictions, especially those who are involved in the said Confraternity,” dugang niya.
Giluwatan ni David ang circular human ang Prefect of the Dicastery for the Doctrine of the Faith, Cardinal Ladaria, nipadala kaniya og suwat niadtong Mayo bahin sa maong butang.
Kini agi’g tubag sa naunang sulat nga gipadala ni Lipa Archbishop Gilbert Garcera, kinsa nangayo og giya sa Vatican sa mga pagpangandam nga gihimo sa Confraternity.
“It would not be advisable for you to authorize the aforementioned celebration under any form,” matod ni Ladaria.
“Hence, this Dicastery asks you to dissuade any form of activity in view of the proposed celebration in Lipa,” siya nidugang.
Sumala sa Vatican, ang maong mga selebrasyon kinahanglan nga pugngan tungod kay ang nahauna nagmando na niadto pang 1951 nga ang giingong mga pagpakita sa Lipa “walay supernatural nga kinaiya o gigikanan”.
Gipasiugda niini nga ang desisyon sa Supreme Sacred Congregation of the Holy See diretsong giaprobahan ni Pope Pius XII. / SunStar Philippines