Giaprobahan na sa mga obispo sa nasod ang hangyo sa diyosesis sa Laoag nga ablihan ang santos nga kawsa ni Niña Ruiz-Abad kinsa namatay tungod sa sakit sa kasingkasing sa edad nga 13.
Ang maong hangyo gipresentar ni Obispo Renato Mayugba sa Laoag atol sa bag-o lang nga plenary assembly sa episcopal conference sa Diocese of Kalibo.
Matod ni Mayugba nga si Abad nagbilin og dakong epekto sa mga tawo kansang kinabuhi natandog sa iyang lalom nga pagtuo sa Diyos ug mga buhat sa gugmang putli bisan pa sa iyang pagkabatan-on.
Si Abad nadayagnos nga adunay hypertrophic cardiomyopathy sa dihang siya 10 anyos.
Siya natawo sa Quezon City apan ang iyang pamilya mibalhin sa Sarrat, Ilocos Norte niadtong Abril 1988 tungod sa trabaho sa iyang mga ginikanan isip abogado.
Gikan sa elementarya diin nigradwar siya sa kinatas-ang klase hangtod sa first year high school, nagtungha si Abad sa Mariano Marcos State University Laboratory School.
Nibalhin siya og balik sa Manila niadtong 1993 sa iyang ikaduhang tuig sa hayskol diin siya nagtungha sa College of Holy Spirit sa Quezon City.
Giatake sa kasingkasing si Abad samtang nagtungha niadtong Agusto 16, 1993 ug niresulta kini sa iyang kamatayon.
Gilubong siya sa usa ka publikong sementeryo sa Sarrat.
Si Mayugba miingon nga si Abad adunay lig-on nga debosyon sa Eukaristiya ug naghalad sa iyang kinabuhi sa pag-apod-apod sa mga rosaryo, Bibliya, mga libro sa pag-ampo, balaang mga larawan, ug uban pang relihiyusong mga butang, nga “talagsaon alang sa iyang edad.”
Nailhan usab siya nga kanunay nagsul-ob og rosaryo sa iyang liog ug puti nga sinina.
“During her time, it is unusual that a young girl had already done acts to evangelize others,” matod ni Mayugba.
“Niña’s life was a prayerful life full of reverence, worship and intimate relationship with God, Jesus Christ, the Holy Spirit and to the Blessed Virgin Mary,” dugang niya.
Siya niingon nga si Abad mahimong “usa ka maayong modelo sa pagkadiosnon ug kalig-on” alang sa mga batan-on sa nasod.
Uban sa pag-uyon sa mga obispo, usa ka pormal nga imbestigasyon sa kinabuhi ug pagsaksi ni Abad, nga mahimong molungtad og katuigan sa dili pa ang usa ka posible nga desisyon gikan sa Roma bahin sa iyang potensyal nga beatipikasyon ug kanonisasyon ipahigayon.
Ang inisyal nga mga yugto naglakip sa pagtigom og impormasyon mahitungod sa kandidato ug pag-interbyu sa mga saksi nga nakaila kaniya. (TPM sa SunStar Philippines)