CCMC tapuson sa di pa mapupos ang termino ni Rama

Usa ka tuig sukad milingkod isip mayor, gilatid ni Michael Rama ang polisiya nga gitinguha sa iyang administrasyon nga ipadayon, lakip na ang paghuman sa pagtukod sa Cebu City Medical Center (CCMC) sa dili pa matapos ang iyang termino sa 2025.

Sa sayong bahin ning tuiga, si Rama niingon nga gusto niya nga hingpit nang magamit ang CCMC sa katapusang quarter sa 2023. Ang 10 ka andana nga CCMC gisugdan niadtong Hulyo 4, 2014. Giguba ang karaang edipisyo sa tambalanan human kini naguba sa linog sa 2013 nga niigo Central Visayas.

Ang mayor nihatag og pakigpulong atol sa Thanksgiving Dinner sa Marco Polo Plaza Hotel niadtong Lunes sa gabii, Hulyo 3, 2023.

Sa pakigpulong, gusto ni Rama nga magtukod og lima ka gagmay nga mga tambalanan sa dakbayan; maghimo og boulevard ug maghimo og mga boardwalk subay sa na-recover nga three-meter easement; ug pagkompleto sa socialized housing projects sa south ug north districts.

Sayo niini, si Rama nihatag sa iyang State of the City Address (Soca) sa Plaza Sugbu pinaagi sa audiovisual presentation (AVP).

Ang presentasyon nagpasundayag sa iyang mga kalampusan ug naglatid sa umaabot nga mga plano, lakip na ang pagtukod sa ikaduhang dam, nga gisaad sa Pilipinong bilyonaryo nga si Enrique Razon. Apan atol sa press conference human sa iyang Soca, si Rama nihisgot nga nagpaabot pa siya sa pagpahigayon sa feasibility study. Sa pagkakaron, ang bugtong dam sa dakbayan sa Sugbo nahimutang sa Barangay Buhisan.

Gihisgutan usab sa AVP ni Rama ang planong pagbutang og mga cable car sa hinterlands sa dakbayan, lakip sa ubang mga proyekto.

Ang nitambong naglakip nila ni Cebu Gobernador Gwendolyn Garcia, Cebu City Vice Mayor Raymond Alvin Garcia, Presidential Assistant for the Visayas Terrence Calatrava, ug kadaghanan sa mga konsehal sa dakbayan.

Ang mga diplomat gikan sa ubang kanasuran naminaw usab sa Soca ni Rama—Japanese Consul General Hideki Yamaji, Korean Consul General Song Sewon ug Chinese Consul General Zhang Zhen.