Gipasalig sa kapulisan sa dakbayan sa Sugbo nga sa Hunyo 12, 2023 wala nay libud suroy nga makita diha sa kadalanan ug mawagtang na ang mga paghugawhugaw sa palibot sa siyudad.
Pagtuman kini nila sa gihatag nga tagal ni Cebu City Mayor Michael Rama.
Nagtambayayong karon ang kapulisan, Prevention, Restoration, Order, Beautification and Enhancement (Probe), Cebu City Anti-Mendicancy Board, Task Force Street Children uban sa City Legal Office ug Department of Social Welfare and Services aron matuman ang kamandoan ni Rama sa paglimpyo sa dakbayan sa Sugbo gikan sa hugaw ug mahipos na ang mga libud-suroy sa kadalanan.
Matod ni Police Colonel Ireneo Dalogdog, hepe sa Cebu City Police Office, nga sa dili pa ang Hunyo 12, 2023 ila nang makab-ot ang paglimpyo sa siyudad.
Wala nay makita nga nangatulog sa mga aseras ug nagpakilimos sa kadalanan.
Gihatag sa kapulisan ang ilang tibuok suporta sa mga programa sa mayor, ilabi na ang beautification project niini sa tinguha nga makab-ot ang Singapore-like Cebu City nga tumong ni Rama.
Gibutyag ni Dalogdog nga kadtong mga tawo nga naa sa ilawom sa mga taytayan namuyo ug mangatulog gipanghinginlan na ug gipapauli sa probinsya samtang kadtong wa pay kapaulian nga mga pamilya gipahimutang sa South Road Properties (SRP).
Gi-monitor kini sa matag police station aron dili sila mamalik sa ilawom sa mga taytayan nga makapahugaw sa kasapaan.
“Gipang monitor na sila tanan nga dili mamalik aron padayon nga limpyo ang atong sapa ug ang atong dakbayan sa Sugbo,” matod ni Dalogdog.
Gidoble pa sa kapulisan ang ilang trabaho nga mao ang pagpamintal sa mga kongkretong koral ug mga paril sa kadalanan.
Gani sa gawas sa Camp Sotero Cabahug sa Dalan Gorordo, nagtinabangay ang mga polis sa paghawan sa aseras aron mapalapdan ang sidewalk ug ilang isunod ang pagpintal.
Giangkon sa police official nga dili nila makuha ang tagal sa mayor kon dili moabag ang mga barangay official sanglit kuwang sila og mga personnel.
Giawhag usab nila ang mga tag-iya og balay patigayon nga sila usab ang mopintal ug molimpyo sa ilang tugkaran agi’g suporta sa programa sa mayor.