Gitigum sa bag-ong gitudlo ni Cebu City Mayor Michael Rama nga peace and order adviser sa dakbayan sa Sugbo nga si kanhi PNP Chief retired General Debold Sinas ang kapulisan aron iladlad ang mga programa nga iyang ipatuman sa siyudad.
Matod ni Police Lieutenant Colonel Wilbert Parilla, deputy city director for administration sa Cebu City Police Office, nga ang guidance ni Sinas sa kapulisan mao ang pagtutuk sa kriminalidad sa dakbayan, lakip na ang internal cleansing.
Gitinguha sa kanhi PNP chief nga luwas ang siyudad sa Sugbo gikan sa mga kriminal, ilabi na nga nibalik na ang face-to-face classes sa mga pribado ug publikong tunghaan nga angay nga hatagan og pagtagad.
Gisugo usab si Sinas sa mayor nga disiplinahon ang badlungon nga mga pulis sa siyudad nga mao usab ang kamandoan sa kasamtangan nga PNP Chief nga si Police General Rodolfo Azurin Jr.
Tungod niini, iyang gimando sa kadagkoan sa CCPO nga ipaubos sa kinalit nga drug test ang kapin sa 1,000 ka mga pulis aron masiguro nga walay tiggamitan sa illegal nga drugas.
“He directed us to conduct a hundred percent drug test sa tanang personnel. Mao nay iyang gustong mahibaw-an nga as soon as possible because the city provided us the kits so we can have our hundred percent on the drug testing nga part sa internal cleansing and with those illegal activities which involves PNP personnel,” matod ni Parilla.
Sa miaging semana, si Parilla niingon nga dunay mga pulis ubos sa CCPO nga giimbestigar tungod sa nagkadaiyang mga kalapasan.
Gahapon sa buntag, Agusto 23, 2022, kapin sa 200 ka mga pulis sa nagkalainlaing unit sa CCPO ug mga non-uniformed personnel ang gipaubos sa kinalit nga drug test.
Matod ni Police Lieutenant Colonel Janette Rafter, deputy city director for operations sa CCPO, nga ang drug test kabahin na sa programa sa PNP alang sa internal cleansing.
Kon dunay masuta nga magpositibo sa paggamit sa illegal nga drugas, ipaubos kini sa dismissal proceedings sanglit usa ka grave offense ang maong kaso.
Sobra na sa katunga sa kinatibuk-ang personnel sa CCPO ang napaubos sa drug test karong tuiga ug wala pay usa nga nag positibo sa ginadiling drugas. /