Giawhag sa Cebu City Transportation Office (CCTO) ang kagamhanan sa dakbayan nga iapil sa annual budget sa dakbayan ang pagpalit og speed guns isip lakang aron higpit nga ipatuman ang speed limit sa mga karsada sa dakbayan.
Si CCTO executive director Paul Gotiong nitug-an sa SunStar Cebu Dominggo, Oktubre 9, 2022, nga nisugyot sila og P1.5 milyones alang sa pagpalit og speed guns apan nagkinahanglan pa kini og pagtugot sa City Council.
Una nang gitaho sa CCTO nga mokabat sa 230 ngadto sa 400 ka mga aksidente sa sakyanan ang nahitabo sa kadalanan sa dakbayan matag buwan sa 2022.
Apan matod ni Gotiong nga dili sila maka-categorize kon nahitabo ba kini nga mga aksidente tungod sa overspeeding sanglit ang Traffic Enforcement Unit sa Philippine National Police maoy nagdumala sa imbestigasyon.
Matod ni Gotiong, adunay speed guns ang CCTO apan wala nila kini gamita sa pagpanakop sa mga badlungong drayber tungod sa pagkadili kasaligan sa gadget.
"Naa tay speed gun actually pero dili man sakto labi na kung mag-apprehension. Kini usa ka matang sa radar. It is low quality since it only gives the average speed," matod ni Gotiong sa kombinasyon sa English ug Cebuano.
Sa higayon nga maaprobahan na ang budget, si Gotiong miingon nga nagplano sila nga makakuha og laser speed guns nga adunay tukma nga pag-ila sa gikusgon sa sakyanan.
Sa pagkakaron, ang CCTO nagpahigayon na lang og information drive aron ma-edukar ang mga drayber bahin sa road safety ug traffic rules nga naglakip sa overspeeding.
Ang mga drayber nga madakpan nga paspas makamulta og P2,000 ug upat ka oras nga seminar sa first offense, P2,500 ug upat ka oras nga seminar ug tulo ka oras nga community service sa ikaduhang kalapasan, ug P3,000 plus ang pag-impound sa sakyanan sa ikatulo nga paglapas.
Sa laing bahin, usa ka non-government organization (NGO) ang mitanyag nga makigtambayayong sa kagamhanan sa siyudad aron ipatuman ang road safety measures.
Ang Project Cares, usa ka NGO nga gilangkuban sa mga pribadong kompanya nga gitumong sa pagtabang sa local government units sa paghimo og mga ordinansa nga nagpasiugda sa mas maayong mga lagda sa kaluwasan sa kadalanan.
Sa taho gikan sa Public Information Office sa Siyudad niadtong Sabado, Oktubre 8, si Gotiong niingon nga ang pagtinabangay magtugot sa CCTO sa pagpresentar sa Konseho sa Dakbayan sa pipila ka basehanan sa paghimo og mga ordinansa nga makaseguro sa kaluwasan sa mga sumasakay.