NAGDUMALA sa Tabunok public market sa Siyudad sa Talisay nibahad batok sa mga kawatan sa merkado nga ilang bilangguon kon madakpan karon nga kompleto na sa close circuit television (CCTV) camera ang dapit.
Sila nihangyo usab sa mga biktima nga kon masikop ang kawatan, tinud-on nila sa pagpapasaka og kaso aron mahatagan og leksyon ug magmatngon.
Gitug-an ni Winnie Bas, administrador sa Tabunok market, nga sukad pagsugod ning tuiga, nitala na sila og tulo ka mga insidente sa kawat.
Sagad sa mga mabiktima mga mamalitay, kinsa malinga sa dala nilang mga butang ug kwarta sa pagpangumpra.
Apan wa usay swerte ang mga kawatan kay adunay kapin sa 10 ka CCTV ang merkado.
Niadtong Biyernes, Pebrero 21, kulata ang naangkon sa usa sa mga nasakpang kawatan sud sa merkado.
Sa ulahing bahin sa miaging tuig, ang CCTV alang sa merkado gipauna og palit ni Mayor Gerald Anthony Gullas Jr. human niadtong Agusto nakadawat sila og reklamo gikan sa mga tindera nga mabiktima sa mga kawatan nga bisan ang balde sa bag-ong kuha nga isda lakip sa kawaton. Matod ni Bas nga nasulosyunan na ang problema. Apan anaa pa sa mga kawatan ang way kahadlok ug nagsalig lang sa pagpangawat.
Anaa man ang monitor sa CCTV sa merkado, apan adunay higayon nga malipat usab sila sa bantayan tungod sa kadaghang tawo. Hinuon diha na sa pag-retrieve sa kuha mailhan ang mga kawatan.
Problema lang nila nga di mopadayon sa pagpasaka sa kaso ang biktima ilabi na kon mabalik na ang gikawat.
Ang kapulisan sa Talisay ni-roving ug nag-monitor ilabi na batok sa mga mapahimuslanon.
Hangyo lang nila sa mga biktima nga mo-report dayon aron maaisyuhan dayon ug mopasaka og kaso batok sa gitudlong kawatan. (FMD)