Cebu City host sa Palaro 2024 human sa 30 ka tuig

Cebu City host sa Palaro 2024 human sa 30 ka tuig

Kapin sa 12,000 ka mga atleta ug coaches ang gipaabot nga mobisita sa dakbayan sa Sugbo human kini napili nga mo-host sa Palarong Pambansa sa 2024, tulo ka mga dekada sukad ang Siyudad katapusang nag-host sa labing dakong sports meet sa nasod.

Pipila ka mga tumong ang gitakda sa Cebu City Government ug Cebu City Sports Commission human nakadaog sa bid isip sunod nga host nga local government unit alang sa Palaro, lakip na ang pag-andam sa national ug international-standard sporting venues, paghatag og komportable nga billeting quarters alang sa mga atleta, maayong sistema sa transportasyon ug pagpalambo sa sports tourism.

Target sab sa Siyudad nga mahuman ang renovation ug repair works nga gihimo sa Cebu City Sports Center (CCSC) sa dili pa matapos ang 2023.

Si Department of Education (DepEd) Assistant Secretary for Operations Francis Cesar Bringas nipahibalo sa mananaog nga bidder sa Palaro 2024 atol sa closing ceremony sa Palarong Pambansa 2023 sa Sabado, Agusto 5, 2023, sa Marikina Sports Center sa Marikina City.

BISITA

Gawas sa mga atleta ug coaches, labing minos 25,000 ka mga sakop sa pamilya sa mga atleta, coaches, ug mga bisita gipaabot usab nga mobisita sa isla sa Sugbo alang sa maong kalihukan.

Si Cebu City Councilor Donaldo “Dondon” Hontiveros, sa miaging pakighinabi, niingon nga ang pag-host sa Palaro dili lang adunay positibo nga epekto sa industriya sa sports sa Sugbo, apan ang pag-abot sa liboan ka mga atleta, coach, ug ilang mga pamilya makapausbaw sa turismo ug klima sa ekonomiya sa tibuok isla sa Sugbo.

Gitugyan ni Marikina City Mayor Marcy Teodoro ang bandera sa Palarong Pambansa ngadto kang Cebu City Mayor Michael Rama human sa maong pahibalo.

Gipaabot nga himuon sa Hulyo ang Palarong Pambansa 2024.

Katapusang nag-host ang dakbayan sa Sugbo sa Palarong Pambansa niadtong 1994, sa samang tuig dihang gitukod ang CCSC.

Kini ang ikatulong higayon nga ang siyudad nahimong host sa sports meet. Ang Sugbo maoy unang nag-host sa Palaro niadtong 1954 ug ikaduha niadtong 1994. Ang Palaro nagsugod niadtong 1948.

Ubang local government units nga ning-apil sa bid sa pag-host sa Palaro 2024 mao ang Antique Province ug Negros Occidental.

Si Rama, sa iyang pakigpulong, niingon nga ang Cebu City nangandam na sa pag-host sa Palaro sunod tuig.

“I am standing here elated, touched, and thankful in behalf of Cebu City. I brought... all officialdom in the field of sports, we are all here just to bring to all of you how ready Cebu City to become the next host of Palarong Pambansa 2024,” matod ni Rama sa iyang acceptance speech.

NANGANDAM

Si Rama niingon nga ang pag-host sa labing dako nga sports meet sa nasod “usa ka dako nga tahas ug responsibilidad,” apan iyang gipasalig nga ang Siyudad andam ug andam nga mobarog sa okasyon.

Nagpasabot usab kini nga du­gang trabaho ang nagpa­abot sa City Government ug sa Sports Commission.

Si Rama niingon nga ang Siyudad nakigtambayayong usab sa pribadong investors sa pagtukod og bag-o ug modernong mga pasilidad sa dakbayan.

Si Cebu City Sports Commissioner John Pages, sa pakighinabi sa Sabado, Agusto 5, nagkanayon nga ang pagplano ug pagpangandam maoy sunod nga lakang nga himuon sa Siyudad aron mahatagan og dili malimtan ug malampuson nga Palaro sunod tuig.

Si Pages nagkanayon nga ang mga inisyal nga plano sa Siyudad ug sa komisyon naglakip sa pagpahigayon og sesyon sa pagplano uban sa mga mahinungdanong stakeholders nga naglakip sa City Government, Sports Commission, Department of Education (DepEd), pribadong sektor, ug sports community, ug uban pa; pagporma sa Palarong Pambansa 2024 organizing committee; ug kompletuhon ang mga renovation ug repair works sa CCSC sa katapusan sa 2023.

Si Pages niingon nga pipila sa mga tumong nga giila sa Siyudad ug sa komisyon alang sa Palaro sunod tuig naglakip sa:

Mga lugar nga duwaan aron makab-ot ang nasyonal o internasyonal nga sumbanan

* Komportable nga billeting quarters para sa mga atleta ug mga opisyal

* Daghang puy-anan alang sa mga bisita

* Maayo nga sistema sa trans­portasyon nga magamit sa tanan

* Talagsaon nga pagbukas ug panapos nga mga seremonyas

* Sama sa Sinulog nga kapistahan ug kalingawan alang sa mga delegado

* Aron mahatagan og dag­hang kapilian ang mga bisita sa pagsuroy sa Sugbo

* Pagdasig sa mga atleta nga gusto nga mahimong kuwalipikado alang sa Palaro 2024, ug pagdasig sa mga dili atleta nga moapil sa sports

Si City Administrator Collin Rosell, sa pakighinabi niadtong Mayo 21, nagkanayon nga ang City Government nigahin og P59 milyunes alang sa pagpalambo sa CCSC.

Ang tulo ka dekada nga pasilidad gisirad-an sa publiko niadtong Mayo 18 aron maha­tagan og dalan ang mga renovation ug repair works niini.

Matod ni Rosell nga ang Siyudad mag-ayo ug mopalambo sa mga pasilidad sa CCSC, lakip na ang pool, rubberized track oval, grandstand, ingon man ang rest rooms ug parking lot. (JJL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph