ILUSAD sa Kagamhanan sa Dakbayan sa Sugbo ang “garbage clearing storm” sa Disyembre 30, 2021 ug Enero 2, 2022 aron paghawan sa tanang mga karsada sa siyudad sa nagpasad nga mga debris nga gibilin sa bagyong Odette nga miigo sa Kabisay-an sa Disyembre 16, 2021 ingon man nagtipun-og nga mga basura nga wa na makolekta.
Gitawag kini sa administrasyon ni Mayor Michael Rama og Enhanced Citywide Qualitative Health and Sanitation (ECQ-HS) Drive and Days.
Ang pagpatuman niini sama og enhanced community quarantine (ECQ), nagpasabot nga way bisan kinsa nga sayon sayon nga makagawas sa balay ug karsada gawas lang niadtong mga frontliner ug essential workers ug dunay mahinungdanon kaayong lakaw.
Ang mopatuman niini ang kapulisan sa Cebu City City Police Office (CCPO).
Matod ni Cerwin Eviota, public information officer sa Dakbayan sa Sugbo, nga pirmahan ni Rama ang executive order alang niini ug ipresentar sa usa ka press briefing karong adlawa, Disyembre 29.
Matod ni Eviota nga pinaagi sa ECQ-HS, mapadali sa Siyudad ang paghawan sa kadalanan kay wa na may daghang mga sakyanan nga makababag.
“It means the city will be placed under an ECQ-like status, to be strictly enforced by the police who were briefed last night (Dec. 28),” matod ni Eviota.(REV)