Giaprobahan sa Ormoc City Disaster Risk Reduction and Management Council (OCDRRMC) pinangulohan ni Mayor Richard Gomez ang resolusyon sa paghatag og tabang pinansyal sa Central Visayas ug pipila ka lungsod sa probinsya sa Leyte.
Base sa resolusyon, hatagan og tag P1 million ang Cebu City ug Cebu Province nga apektado sa bagyong Odette.
Hatagan usab og tag P500,000 sa Ormoc ang mga lungsod sa Matalom, Inopacan, Hindang, Hilongos ug Bato, Leyte.
Sa miaging Biyernes, Disyembre 31, 2021, pipila ka oras una pa ang Bag-ong Tuig, gipasar sa Konseho ang resolusyon sa paghatag og dugang tabang.
Matod ni Gomez, una nga hatdan sa tabang pinansyal ang mga lungsod sa Southern Leyte nga mao ang Limasawa, Liloan, Pintuyan, San Francisco ug San Ricardo.
Dugang ni Gomez nga gibase ang paghatag sa mga datos nga nakuha gikan sa mga lokal nga kagamhanan diin gitan-aw kon unsa nga lugar ang grabeng naapektohan sa bagyo.
“Kaya man nato. So, motabang gyod ta. Sa panahon nga ang Ormoc nagkinahanglan og tabang, naa sila nitabang nato. Panahon na sab karon nga kita ang motabang,” matod sa mayor.
Una na nga nagpadala og Quick Response Team (QRT) gikan sa CDRRM si Gomez. Nagpadala usab siya og emergency vehicles, equipment, hygiene ug shelter kits ug food packs sama sa bugas.
Pipila ka adlaw ang milabay, gi-deploy usab ang mga sakop sa Ormoc City Health Department (OCHD) dala ang mga tambal, vitamins, ubang mga medisina ug tubig mainom.
Matod sa mayor, andam ang LGU Ormoc mohatag og dugang tabang kutob sa makaya.