Gihimo na karon sa Cebu City Government ang ilang evaluation sa gisugyot nga lokasyon sa labing unang large-scale waste-to-energy (WTE) facility sa nasod.
Si Atty. Collin Rosell, secretary ni Mayor Michael Rama, nitug-an sa SunStar Cebu niadtong Biyernes, Pebrero 10, nga ang report gipaabot nga mahuman sulod sa buwan.
Ang mga representante sa New Sky (China) Environment ug Techo Co Ltd., tigpasiugda sa WTE project, nakigtagbo kang Rosell sa City Hall niadtong Huwebes, Pebrero 9
.
Matud ni Rosell, walay dagkong kalamboan nga nahisgutan atol sa tigom ug ang mga executive sa kompaniya gusto lang nga “maghatag og nawong” sa ilang pasalig sa pagkompleto sa proyekto.
Niadtong Septiyembre 2022, ang City Government ug New Sky Energy Philippines Inc. nisulod sa joint-venture agreement alang sa pagtukod sa P4.8-bilyunes nga pasilidad nga makahimo sa pagproseso sa 800 ka toneladang basura kada adlaw.
Ang kompaniya mipili og pito ka ektarya nga propiyedad sa bukirang barangay sa Guba isip dapit alang sa garbage incinerator facility.
Si Rosell niingon nga adunay gihimo nga site evaluation ang nagkalainlaing buhatan sa City Hall sama sa City Environment and Natural Resources, Solid Waste Management Board, Department of Public Services, ug Department of Engineering and Public Works.
Matud niya nga ang resulta sa evaluation maoy basehan sa proponent kon ipadayon ba nila ang pag-angkon sa piniling pribadong lote sa Guba.
Ang mga hinungdan nga gikonsiderar sa Siyudad sa iyang ebalwasyon mao ang gilay-on sa paghakot sa mga basura, ang kasamtangang imprastraktura sa kadalanan, ug uban pang aspeto sa kinaiyahan, dugang niya.
Si Rosell nidugang nga ang mga tigpasiugda makakuha sa tanan nga gikinahanglan nga mga permit sa gobyerno sulod sa tuig
“As far as the Office of the Mayor is concerned, wala paman ilang formal recommendation and report on the matter for the mayor to act upon, including the Sanggunian (Panlungsod),” matud ni Rosell.
Ang Sangguniang Panlungsod hatagan og kopya sa evaluation report ug kon walay mga pagsupak, usa ka resolusyon nga walay pagsupak ang ipagawas aron mapadayon ang proyekto, dugang niya.
Dugang pa ni Rosell nga ipahigayon ang public hearings ug consultations aron masiguro nga madungog ang katungod sa katawhan ilabina kadtong mga residente nga nagpuyo duol sa gisugyot nga lokasyon.
“Kaning project site taaas kaayo nga storya kay naay right of the people to participate in the decision making on matters affecting their interest,” matud ni Rosell.
Ang gisugyot nga pasilidad sa WTE gilauman nga makamugna og elektrisidad nga igo na sa pag-supply sa 40,000 ka mga balay.