Gikinahanglan pang hapit masunog ang usa ka tibuok building una pa mohimo og lakang ang gobyerno sa pagsuta ug pag-upgrade sa mga ekipo nga gigamit sa kabomberohan.
Ang Cebu City Government makigtambayayong sa pribadong sektor sa pagpamalit o pag-abang og mga helicopter ug fire service ladders aron magamit sa pagtubag sa mga insidente sa sunog nga naglambigit sa tag-as nga mga edipisyo.
Si Cebu City Mayor Michael Rama nimando sa mga executive head, apil na si City Administrator Collin Rosell, nga paspasan ang pagpalit sa mga personal protective gears sama sa mga mask nga adunay mga filter ug breathing apparatus nga gamiton sa mga bombero ug uban pang responders, ingon man alang sa mga residente nga nagpuyo sa duol.
Kini nga mga plano nitumaw human sa sunog nga miigo sa Grand Residences condominium niadtong Abril 14, 2023 nga nilungtad og siyam ka oras nga miresulta sa danyos nga mokabat sa halos P4 bilyunes.
Si Rama, sa pakighinabi niadtong Martes, Abril 18, niingon nga dugay na unta nga napalit ang mga ekipo nga gamiton sa mga bombero.
“We need it yesterday, so we must have find a way, katong mga equipment, medical ug unsa pa, that should already purchased,” matod ni Rama kang Rosell ug City Legal Officer Jerone Castillo, kinsa pareho niyang special assistants.
Si Rosell, sa linain nga pakighinabi sa Martes, nagkanayon nga ang Siyudad moandam na sa budget nga makuha gikan sa Quick Response Fund (QRF) alang sa pagpalit sa breathing apparatus ug uban pang protective gears ug paliton sa labing daling panahon.
Sa gidaghanon sa mga butang nga paliton, ang Siyudad magdepende sa imbentaryo sa kabomberohan.
Madeterminar usab ang budget sa higayon nga maandam na ang gidaghanon sa mga butang.
Matod usab ni Rosell nga mopatawag og tigom ang mayor nga mag-imbitar sa pribadong sektor ilabi na sa mga tag-iya og tag-as nga mga edipisyo aron makahimo sila og uniporme nga mga lakang ug polisiya.
“Kanang ladder gamay ra kaayo na. We are thinking already higher equipment kay high-rise building (owners), they can always be group together to procure or to rent helicopters and all just to save and contribute to the city,” matod ni Rosell.
Si Rama niingon sa mga tigbalita nga iyang tigumon ang tanang hingtungdan nga mga departamento ug buhatan, ang mga barangay, uban ang pribadong sektor, aron makahimo og mga komprehensibong lakang.
“Balik lang gyud ta sa pagka-proactive,” matod ni Rama.
“We have to be quick. Ganahan ko mo-declare ba nga this whole thing is no longer a joke,” dugang niya.
Dili usab hilig si Rama nga mangayo og tabang gikan sa Nasudnong Kagamhanan sa pagpalit og dugang mga ekipo sa kabomberohan sanglit sila usab nag-atubang sa ilang kaugalingong mga kabalaka, ug nidugang nga ang Siyudad adunay lig-on nga relasyon sa pribadong sektor sa dakbayan.
Sa laing bahin, gisuspenso sa Office of the Building Official (OBO) sa dakbayan sa Sugbo ang pagtrabaho sa Grand Residences condominium, samtang ang management gimanduan sa pagpasabot ug pagtuman sa gikinahanglang mga rekisitos.
Gipagawas sa OBO ang mando sa pagsuspenso sa edipisyo sa Shogun Management and Corporation, ang tagdumala sa Grand Residences, kaniadtong Lunes, Abril 17.
Ang management gikinahanglan nga mosumiter sa incident report, corrective actions, methodology, mitigation works, ug uban pang may kalabutan nga mga dokumento ug justification letters, sulod sa tulo ka adlaw gikan sa pagkadawat sa order. (JJL)