Laing centenarian ang gihatagan og P100,000 nga pahalipay sa Kagamhanan sa dakbayan sa Danao.
Si Quirina Caputol Durano, taga Sitio Coacohon, Barangay Dunggoan, niselebrar sa iyang ika-100 nga birthday sa Disyembre 10, 2022.
Nangulo sa pagdunol sa pahalipay si Danao City Mayor Mix Durano inubanan nila ni Konsehal Danny Roble, Senior Citizens Affairs Office (OSCA) ug City Social Welfare and Development Office (CSWDO).
Ang maong centenarian maoy ika-11 nga gigantihan sa kagamhanan.
Gisaysay sa mayor nga subay sa iyang pakighinabi sa centenarian, anaa pa kini sa piskay ug himsug nga kahimtang.
Nalakip sa sekreto ni Lola Quirina ang tuba matag gabii ug pure nga tabako.
Nanghinaot si Durano nga mahimong kapanaminan sa mga batan-on ang mga centenarian sa syudad nga magkinabuhi nga malipayon ug himsug bisan pa man sa paglabay sa panahon.
“Like our first centenarians, I am hoping that they will serve as inspirations to us in taking care of our health - physically, spiritually, mentally and emotionally. And to the family of Lola Quirina, ampingan ug panggaon siya. Talagsaon kaayo. Her life is a blessing. She is a blessing,” matod ni Durano.
Gawas sa P100,000, nalatid sa City Ordinance 32-15 nga makadawat usab og P25,000 nga mortuary assistance ang centenarian.
Ang ika-10 nga centenarian nga taga Barangay Cahumayan unang gipahalipayan niadtong Septiyembre 2022.