Gihangop ni Lapu-Lapu City Mayor Junard “Ahong” Chan ang desisyon sa Inter-Agency Task Force (IATF) for the Management of Emerging Infectious Diseases nga nirekomendar ngadto kang Presidente Ferdinand Marcos Jr. sa pagtangtang sa mandatory nga pagsul-ob og face mask sa bukas nga mga dapit sa tibuok nasud.
“Aw, maayo na. It’s a good development ang face mask pwede na dili na isul-ob og mga outdoor,” matod ni Chan sa mga tigbalita sa Huwebes, Septiyembre 8, 2022.
Gisubli ni Chan nga adunay mga tawo nga naglisud sa pagginhawa sa gawas nga adunay face mask tungod sa kainit.
“So, at least dili na kaayo mahasol atong mga kaigsuonan labi na kon outdoor. Usahay init uncomfortbale kaayo ta,” matod niya.
Niadtong Miyerkules, Septiyembre 7, si Press Secretary Trixie Cruz-Angeles miingon nga ang IATF mirekomendar sa liberalisasyon sa face mask policy sa nasud sa “open, non-crowded and well-ventilated areas.”
Una niini, si Cebu City Michael Rama niluwat og Executive Order (EO) 5 niadtong Agusto 31, nga nagdeklarar sa paggamit sa mga face mask sulod sa teritoryo sa Cebu City nga dili obligado sa hawan nga mga luna o dili, gawas lang sa mga pasilidad sa medisina sa pagbuot sa tagdumala niini ug alang sa mga tawo nga nakasinati og mga simtomas sama sa trangkaso nga mogawas sa ilang mga pinuy-anan.
Bisan pa, ang rekomendasyon sa IATF nagtugot lamang sa dili pagsul-ob sa mga face mask sa bukas nga mga lugar ug wala maglakip sa sulod o sirado nga mga lugar sama sa mga terminal sa transportasyon ug mga pampublikong sakyanan tungod kay kini mga lugar nga daghang tawo.
Si Rama niingon nga ang iyang EO ipatuman gihapon sa dakbayan samtang maghuwat sa iisyu gikan sa Presidente. Dugang pa sa mayor nga ang kamandoan nga dili obligado ang pagsul-ob og face mask sa dakbayan sa Sugbo usa ka produkto sa convergence nga gisalmotan sa lainlaing stakeholders.
Si Chan, niadtong Agusto 31, nitug-an sa SunStar Cebu nga iyang sagupon ang executive order ni Rama sa higayon nga makakuha na siya og kopya niini.
Apan niadtong Biyernes, Septiyembre 2, siya niingon nga wala na siyay panahon sa pagpatawag sa iyang health team aron hisgotan ang maong butang tungod sa nagpadayong evaluation sa Department of the Interior and Local Government (DILG) alang sa Seal of Good Local Governance (SGLG) para sa piskal nga tuig 2022.
Gitataw ni Chan kaniadtong Septiyembre 8 nga ang tanan ingon og mobalik sa normal, ug nidugang nga ang mga kaso sa Covid-19 sa siyudad nagpabilin nga ubos.
Ang Central Visayas adunay 1,068 ka aktibo nga mga kaso sa coronavirus disease (Covid-19), 43 niini ang bag-ong gitaho nga mga kaso kaniadtong Huwebes, Septiyembre 8, ang datos gikan sa Covid-19 Tracker sa Department of Health sa Central Visayas (DOH 7) nagpakita.
Sa mga aktibo nga kaso sa Covid-19, ang Cebu City adunay labing taas nga adunay 418, ang 17 niini ang bag-ong nataho nga mga kaso samtang ang Lapu-Lapu City adunay 52 ka aktibo nga kaso nga adunay tulo nga bag-o.