Chinese national natagak sa gitukod nga building, patay

Namatay ang usa ka Chinese national human natagak sa gitukod nga building sulod sa pabrika sa semento sa Barangay South Poblacion, lungsod sa San Fernando, alas 11 sa buntag, Martes, Septiyembre 19, 2023.

Si Li Guanglun, 55, empliyado sa cement company, nagpuyo sa Brgy. South Poblacion, San Fernando, namatay pipila ka oras human nidangat sa South General Hospital sa dakbayan sa Naga.

Si Police Major Mark Anthony Villanueva, hepe sa San Fernando Police Station nga nahinahi sa Superbalita Cebu, nagkanayon nga way foul play, aksidente ang hitabo.

Ang biktima natagak gikan sa ikaduhang andana nga may gihabugon nga 30 ka tiil sa gitukod nga edipisyo sa planta.

Sumala pa niini nga ang biktima uban sa mga trabahante nga Chinese national maniudto na unta niadtong higayuna.

Ninglabang sila sa pikas habig sa building agi sa kahoy nga hagdanan apan kini nabali.

Ang biktima nitugpa sa daghan nga construction materials sa ubos hinungdan nga nakaangkon og grabing kadaot sa kalawasan.

Sumala pa ni Villanueva nga alas 3:25 na sa hapon gipahibalo ang kapulisan sa insidente.

“Habog ang natagakan maong wala maka-survive. Pero aksidente ang nahitabo, duna silay insaktong harness,” dugang ni Villanueva. (GPL)