Nanghangyo ang Commission on Human Rights (CHR) Central Visayas ngadto sa Kagamhanan sa Dakbayan sa Sugbo nga dili magpihig sa mga wala pa mabakunahi pinaagi sa dili pagpasulod sa charging station sa city hall.
Si CHR 7 Director Arvin Odron nitug-an sa SunStar Cebu nga ang komisyon nagsuporta sa inisyatiba sa Dakbayan sa pagtanyag og public charging station ngadto sa mga tawo nga wala pay kuryente sa ilang balay.
Bisan pa, si Odron miingon nga ubos sa lente sa tawhanong katungod, ang “No Vaccination Card, No Charging” nga palisiya makita nga diskriminasyon batok sa wala pa nabakunahan nga mga indibidwal.
“Discrimination exist when there is distinction, exclusion or preference based on the status of a person, such as being vaccinated or unvaccinated,” matod ni Odron.
Ni-react si Mayor Michael Rama sa gisulti ni Odron pinaagi sa paghulga nga sirad-an ang charging station ug ang mga tawo adto na sa buhatan sa CHR mo-charge.
Matod ni Rama nga ang pagpatuman sa maong polisiya nagsilbi nga insentibo niadtong mga nabakunahan.
Dugang pa ni Odron nga ang CHR adunay mandato sa pagmonitor sa pagtuman sa gobyerno sa pagsunod sa mga treaty commitment, partikular sa tawhanong katungod.
“We appeal to the city government to make no distinction or better offer a charging station area intended for the unvaccinated, so they may also enjoy the services offered by the city government to the vaccinated individuals,” dugang ni Odron.
Dugang pa ni Odron nga ang mga wala pa mabakunahi dili angay nga i-discriminate tungod lang kay ilang gigamit ang ilang katungod nga dili mabakunahan.