Si Kongresista Daphne Lagon sa ikaunom nga distrito sa Sugbo moduso og balaudnon sa paghimong siyudad sa Consolacion ug lahing balaudnon alang sa paghimo sa Ibabao National High School sa Cordova sa pagbukas sa ika-19 nga Kongreso.
Si Lagon nibutyag sa SunStar Cebu niadtong Biyernes, Hulyo 1, 2022, nga iyang tuyo nga ipasaka ang mga balaudnon sa pagsugod sa ilang regular session sa Ubos Balay Balauranan.
Ang lungsod sa Consolacion ug Cordova naglangkob sa ikaunom nga distrito.
Matod niya nga usa sa iyang hatagan og prayoridad mao ang paghimong siyudad sa Consolacion, nga matod niya dugay na untang angay himuon.
Matud pa ni Lagon nga sa bag-o lang napasar nga Republic Act 11683, nga nag-amendar sa Local Government Code of 1991, wala na kinahanglana ang populasyon ug luna sa munisipyo.
Kinahanglan nga labing menos moabot sa P100 milyones ang kita sa munisipyo sulod sa duha ka sunodsunod nga tuig.
Gitataw ni Lagon nga ang Consolacion aduna nay kapin sa P100 milyones nga income sulod sa pipila ka tuig isip tinuig nga kita niini, hinungdan nga kini kuwalipikado kaayo nga mahimong siyudad.
NATIONAL SCHOOL
Tinguha usab sa kongresista nga mopasaka og balaudnon alang sa paghimo nga national high school sa tunghaan sa Barangay Ibabao sa Cordova.
Iyang gikutlo ang mga pakigbisog sa kadaghanan sa mga estudyante sa high school sa Barangay Ibabao ug sa mga silingang barangay niini, Cogon, Pilipog, ug Dapitan, nga mobiyahe og layo sa Cordova o Babag National High School sulod sa labing menos usa ka oras o labaw pa aron motungha.
Gitataw ni Lagon nga ang Barangay Ibabao, ikaduhang kinadak-ang barangay sa Cordova, kinahanglang adunay kaugalingong national high school.
Gawas niini, si Lagon mosulay usab sa pag-apelar sa pag-amendar sa lone district law sa Mandaue, nitataw nga ang ikaunom nga distrito ug ang Mandaue lone district kinahanglang adunay tukmang representasyon ngadto sa Provincial Board (PB) aron malikayan ang panagsumpaki ug kalibog.
Ang Mandaue kabahin kaniadto sa ikaunom nga distrito sa Sugbo atol sa ika-18 nga Kongreso.
Gipirmahan ni kanhi Presidente Rodrigo Duterte ang Republic Act 11257, usa ka balaod nga nagmugna sa lone district sa Mandaue City, niadtong Abril 5, 2019.
Ang magbabalaod niingon usab nga iyang tan-awon ang dugang nga mga panginahanglanon sa lungsod sa Consolacion ug Cordova aron makonsiderar nga pun-an ang mga balaudnon alang sa ilang kalamboan.
Ang regular nga sesyon sa Kongreso magsugod sa ikaupat nga Lunes sa Hulyo matag tuig, diin ang duha ka Balay sa Kongreso magtigom, sumala sa nalatid sa 1987 Constitution sa Pilipinas.