Colmenares, kauban gikiha na

GIPASAKAAN na og kasong pagpamaligya og illegal drugs ang kanhi kandidata sa Ms. Cebu 2018 ug ang iyang kauban sa Guadalupe Police Station sa Cebu City Police Office (CCPO) ngadto sa Cebu City Prosecutors Office.

Kagahapon, giduso sa CCPO ang mga kasong kalapasan sa Comprehensive Dangerous Drugs Act of 2002 batok kanila ni Teri Marina Colmenares ug Nicole Allan Casiño.

Ang duha nasakmitan og marijuana ug party drugs nga lysergic acid diethylamide (LSD), mas naila nga acid sa managlahing mga buy bust operation niadtong Sabado sa kaadlawon, Disyembre 15.

Unang nasikop si Casiño sa Barangay Apas samtang sa follow-up operation, nasikop usab si Colmenares.

Nakuhaan si Casiño og LSD samtang marijuana ang kang Colmenares.

Dakong grupo

Nagduda ang kapulisan nga adunay dakong grupo nga nagpaluyo kang Colmenares kay bisan giunsa nila, wa silay napuga nga impormasyon gikan kaniya.

Human masikop si Colmenares sa buy bust operation ug nakuhaan og pito ka pakete sa gituohang high grade marijuana nga giila nga Kush Weed, gipaubos siya sa imbestigasyon.

Apan pakyas ang kapulisan sanglit pabiling tak-om si Colmenares sa pagkooperar ug ang iyang abogado na lang kanunay ang itukmod nga maoy motubag sa kapulisan.

Di usab maabli ang cellphone sa pamasin nga adunay makuha nga kasayuran.

“Ayaw nyang magsalita and yung phone nya we try to explore, but may password. So, we cannot actually search that na kailangan may court order. But we will present yung phone nya as evidence,” matod ni CCPO Director Royina Garma.

Nagduda si Garma nga adunay dakong grupo sa mga durugista ang nagpaluyo kang Colmenares sanglit di ordinaryo nga pagka babaye.

Wa pa hinuon matino kon siya ba ug si Casiño ang tig supply sa LSD party drugs sa mga anak og adunahan sa syudad sa Sugbo nga maoy hinungdan nga padayon ang ilang monitoring ilabi na karon nga nagkaduol na ang Pasko.

Si Chief Supt. Debold Sinas, director sa Police Regional Office 7, nagkanayon nga moabag sila sa Philippine Drug Enforcement Agency 7 human masayran nga ang party drugs gipaagi sa usa ka forwarding company.

Matod ni Sinas nga adunay programa ang PDEA nga makig tie up sa ubang ahensya sa gobyerno aron bantayan kining mga gipadala pinaagi sa forwarding company.