Ang Commission on Elections (Comelec) gikatakdang mopahigayon og hearing karong Oktubre 17, 2023 sa tinguha nga ma-disqualify ang Smartmatic Philippines sa pag-apil sa public bidding alang sa 2025 automated election system (AES) project.
Sa tulo ka pahina nga kamandoan, si Comelec Chairman George Garcia niingon nga ilang gitakda ang pagdungog sa petisyon nga gisang-at sa grupo nga gipangulohan ni kanhi poll commissioner Augusto Lagman alas 10:00 sa buntag sa Session Hall sa ahensya sa Palacio del Gobernador Building sa Intramuros, Manila.
“The Commission (En Banc) hereby sets the instant case for hearing on 17 October 2023, at 10 am, at the Session Hall, 8th Floor, Palacio del Gobernador, General Luna Street, Intramuros, Manila,” matod ni Garcia.
Tungod kay gitakda na ang pagdungog, gimandoan sa poll body ang Smartmatic nga i-file dayon ang komento sa petisyon sa Hunyo 2023.
Siya usab niingon nga ang tanang mga ebidensiya nga nalakip na sa mga rekord sa Komisyon ug ipresentar sa petitioner, kinahanglang markahan daan atubangan sa Opisina sa Clerk sa Komisyon sa Oktubre 16 sa alas 2:00 sa hapon.
Sa laing bahin, ang Comelec niingon nga ang pagsumiter sa mga dokumento nga gituyo alang sa presentasyon sa mga partido atol sa pagdungog ipadala pinaagi sa email pinaagi sa Office of the Clerk of the Commission.
Niadtong Hunyo, si Lagman, kanhi kalihim sa Department of Information and Communications Technology (DICT) nga si Eliseo Rio, retiradong Koronel Leonardo Odoño ug kanhi Financial Executives Institute of the Philippines president Franklin Ysaac misang-at og petisyon nga naghangyo sa Comelec nga i-disqualify ang Smartmatic sa pag-apil sa umaabot nga public bidding para sa 2025 AES. / HDT sa SunStar Philippines