Kasong murder ang ipasaka batok sa 58-anyos nga construction worker kinsa giingong nipatay sa iyang foreman gamit ang steel pipe human gibadlong niadtong Lunes, Agusto 14, sa usa ka construction site sa Mandaue City sa may North Reclamation Area (NRA).
Ang suspek mao si Fausto Quiño, 58, samtang ang biktima mao si Isidro Cameros, 57.
Si Police Major Andy Michael Roque, officer-in-charge sa Mandaue City Police Office (MCPO) Station 1 sa Barangay Centro, niingon niadtong Martes, Agusto 15, 2023, nga ilang tabangan ang kabanay sa biktima sa pagpasaka og kaso human sa pagproseso sa affidavit. Sa pagkakaron nagpaabot pa sila sa mga pamahayag sa mga kauban sa trabaho ni Quiño nga mopaluyo sa kaso.
Base sa inisyal nga imbestigasyon, giingong nag-away sila si Quiño ug Cameros human gipasanginlan sa biktima nga gibuboan og semento ang sayop nga haligi sa edipisyo ug gikasab-an nianang buntag atubangan sa ilang mga kauban.
Matod ni Roque nga gihulga ni Cameros ang suspek nga posibleng dili makadawat sa iyang overtime pay nga posibleng maoy nakapasuko kaniya ug nakaaghat ni Quiño sa pagpatay sa biktima gamit ang steel pipe samtang natulog si Cameros sulod sa ilang barracks niadtong Lunes sa hapon.
“Nigamit siya (suspek) og pointed metal tube nga kasagaran gigamit sa scaffoldings mga 5 metros ang gitas-on ug naigo ang biktima kaduha sa agtang, unya, kausa sa dughan,” matod ni Roque.
Ang tubo gi-turnover sa MCPO Station 1 alang sa dugang imbestigasyon.
Si Roque niingon nga ang mga kauban sa trabaho sa biktima nangayo og tabang sa Mandaue City Disaster Risk Reduction and Management Office (MCDRRMO) aron madala sa tambalanan. Apan ang mga medical personnel sa MCDRRMO nideklarar kaniya nga patay na.
Sa laing bahin, ang suspek nisuway pag-ikyas palayo sa dapit apan nadakpan ug gi-turnover sa kapulisan.
Sa buwag nga pakighinabi, gipasabot ni Quiño nga nahimo niya ang krimen tungod sa kasuko nga nangangkon nga sayop ang akusasyon sa biktima ug gipakaulawan siya pag-ayo.
Siya nidugang nga wala siya nagbasol sa iyang pagpatay ug andam siya nga moatubang og kaso sa iyang gibuhat.
Iyang gitataw nga maayo ang ilang panag-estorya sa biktima niadtong Dominggo, Hunyo 13, ug nasurprisa siya sa gibuhat ni Cameros kaniya pagkasunod adlaw.
Giangkon usab ni Quiño nga nahadlok siya nga basig taktakon siya sa biktima. Sa ingon, mahimong dili niya mapadayon ang pagpatungha sa iyang mga anak.
“Ato pag Sabado, nagpatukod mi og kanang poste kanang buhosanan ba. Nya pagbuhos ana sa gabii sa pang gabii, ningburot ang poste, gikasuk-an ko niya ana pag Lunes nga murag di tawo ta. Mao to naglain ako panan-aw kay giingnan ko niya way buot sa akong trabaho, nya dugay na gyud ko nagtrabaho. Lain kaayo paminawon ingnon kang way buot sa imo trabaho,” ni Quiño. (HIC)