Upat ka corn-drying facilities ang ipahimutang sa Kagamhanan sa Probinsya sa Sugbo sa lungsod sa Medellin aron masiguro nga dunay igong supply sa hybrid yellow corn o mais ang lalawigan.
Kini maoy gipadayag nga inisyatiba ni Cebu Governor Gwendolyn Garcia sa tinguha niyang mapalambo ug maabagan ang small-scale farmers sa naasoy nga lungsod human iyang nahinabi si Hubert Go, vice president for marketing sa H and E Enterprises, Inc.
Ang kompaniya supplier sa mga post-harvest machinery and equipment.
Ang ipahimutang unya nga mga post-harvest facility mahimong makapauga og 15 metriko toneladang lugas sa mais matag 10 ka oras o 30 metriko tonelada ka mga lugas sa mais nga mapauga sulod sa 24-oras nga operation cycle.
“We want to be able to assure farmers that there would be available space for them to dry their harvest,” matod ni Garcia pinaagi sa Sugbo News.
Ang pagbutang og drying facilities gilantaw nga makatabang sa pagdugang sa dagkong buyers sa mais sa probinsya.
Si Dr. Roldan Saragena, provincial agriculturist, nagkanayon nga ang corn dryers gilaraw nga ipahimutang sa may Barangay Caputatan Sur nga sentro ug duol ra sa mga silingang lokalidad sa dakbayan sa Bogo, San Remigio, Daanbantayan, Tabuelan ug Tabogon.
Subay niini, gisugyot sa gobernador nga dili dunganon ang pagtanom sa mga mag-uuma aron dili maguba o mausik ang mga lugas sa mais.
Posibling may mga ipahimutang nga schedule aron dili magdungan og harvest.
Sa inisyal nga pakisusi, moabot sa 695 ka hektaryang basakan sa amihanang Sugbo ang padayong gikombinsir sa Kapitolyo nga mobalhin sa pagpananom og yellow corn.
Sa Septiyembre 2022, gipangulohan ni Garcia ang ceremonial planting sa hybrid yellow corn sa 50-hektaryang model farm sa Barangay Caputatan Sur human nibalhin na sa pagpanom og mais ang mga mag-uuma nga kanhi nananom og mga tubo.
Sa kasamtangan, nagsugod na ang pag negotiate sa provincial agriculture office sa 20 ka dagkong buyers sama sa feed mills ug food processing companies nga direktang mopalit og mais sa mga mag-uuma sa amihanan.
Gawas sa pasiunang dryer facility, plano usab sa Kapitolyo mopalit og dugang mga ekipo nga makatabang sa pagpapaspas ug pagpalambo sa ani sa mga mag-uuma.