PADAYON'G gi-monitor sa Women and Children Protection Center (WCPC) Visayas Field Unit ang ubang cybersex dens nga nag-operate sa siyudad sa Sugbo human sa nahitabo'ng ronda sa Miyerkules sa hapon, Hulyo 13, 2022, didto sa Bo. Luz diin walo ka mga menor de edad ang gi-rescue sa hiniusang operasyon sa WCPC, Regional Anti-Cyber Crime Unit 7, Department of Social Welfare and Development ug sa Department of Justice.
Related story: 8 ka menor naluwas
Giangkon sa WCPC Visayas Field Unit nga naalarma sila sa nahitabong pag-abuso sa mga dalagita nga gikuhaan og hulagway ang pribadong bahin sa ilang lawas aron kini ibaligya sa ilang mga kustomer nga langyaw pinaagi sa social media.
Matud ni Police Major Niño Lawrence Ibo, officer-in-charge sa WCPC, nga makaluluoy kaayo ang mga biktima tungod kay na-trauma ug kun ma-upload na sa porn website ang ilang mga hubo nga hulagway lisud na kini papason.
Bisan pa man nga mi-rason ang mga bata'ng biktima nga maayo na lang kini nga pamaagi sanglit dili man sila mahikap apan giangkon ni Ibo nga padayonon nila ang pag-monitor sa ubang mga cyber sex dens aron masanta ang mao'ng law-ay nga kalihukan.
Hinuon, wala motug-an si Ibo kun unsa nga mga barangay ang adunay nagpahigayon og cyber pornography diin ilang gigamit ang ilang mga anak nga babaye nga menor de edad.
Apan sigun ni Ibo nga dugay na sa ilang ilegal nga kalihukan ang suspetsado base sa nakuha nila nga impormasyon ug mga ebidensya nga mga hubong hulagway sa mga bata ug naputol lamang kini atol sa pagsulbong sa kaso sa Covid-19 sa dakbayan sa Sugbo pag Hunyo 2020 sa dihang gipaubos sa lockdown ang maong barangay.
Atol sa ilang pakig-transact sa suspetsado, nangayo matud pa kini'g $20 (P1,121) bugti sa mga hubong hulagway ug video sa mga dalagita.
Awhag karon sa WCPC sa publiko ilabi na sa dakbayan sa Sugbo nga mopahibawo sa ilang buhatan kun aduna silay masayran nga nagpadagan ug cyber sex den dungan sa pagsaad nga hatagan nila og proteksyon ang mga informant. (AYB)