Gitugot sa Department of Agriculture (DA) ang pag-import sa daghang klase sa frozen nga mga isda alang sa mga wet market gikan sa Oktubre hangtod sa Disyembre 2023.
Ang DA nipagawas niadtong Martes, Agusto 15, 2023, sa Memorandum Circular 36, nga nagtugot sa importasyon sa 35,000 metric tons sa frozen round scad, mas naila nga galunggong, bigeye scad, mackerel, bonito ug moon fish alang sa wet markets gikan sa Oktubre 1 hangtod Disyembre 31 .
Ubos sa maong kamanduan, ang mga importer lamang nga nakaparehistro sa Philippine Fisheries Development Authority (PFDA) sulod sa pito ka adlaw sa tingtrabaho gikan sa pag-issue sa order maoy kwalipikado nga moapil sa importasyon.
Matod pa nga 80 porsiyento sa maximum importable volume ang igahin sa rehistradong mga importer gikan sa commercial fishing sectors, samtang ang nahabilin nga 20 porsiyento adto sa fisheries associations ug cooperatives.
Ang DA moisyu sa unang tranche sa import clearance gikan sa Oktubre 1 hangtod 30 nga molangkob sa 50 porsiyento sa maximum nga gidaghanon sa angkaton samtang ang ikaduhang tranche sa clearance i-isyu sa Nobiyembre 6 hangtod 30.
Ang import clearances mahimong balido sulod sa 45 ka adlaw human sa pag-isyu ug maisip nga expired human sa Enero 15, 2024.
Ang mando nag-ingon nga ang importer kinahanglan adunay kagamitan sa cold storage, o labing menos adunay usa ka kasabutan sa pag-abang sa bodega sa wala pa sila ma-isyuhi sa usa ka sanitary ug phytosanitary import clearance. / TPM sa SunStar Philippines