Andam si Lapu-Lapu City Mayor Junard “Ahong Chan nga mohatag og cash reward niadtong maka-report ug makadakop sa mga indibidwal sa akto nga mihimo og vandalism sa dakbayan.
Si Chan niingon nga mao kini ang iyang nakita nga paagi aron mahunong ang bandalismo taliwala sa paningkamot sa City Government nga ipadayon ang beautification project sa kadalanan nga nasugdan pinaagi sa tabang sa Mactan Artist Guild.
Gitataw sa mayor nga iyang gipintalan og puti ang mga bungbong sa kadalanan sa Barangay Poblacion paingon sa Barangay Gun-ob, Pajo, Pusok, Ibo, hangtod sa Barangay Mactan niadtong 2022, isip pagpangandam sa plano sa siyudad nga magbutang og mural painting.
“Sukad niadto, dili na gyud ko makasabot kon unsa ang tumong niining mga tawhana nga hilig sa pagbuhat og bandalismo,” matud ni Chan.
Si Chan niingon nga andam siyang mohatag sa iyang personal nga kwarta isip reward, diin P10,000 sa makahatag og impormasyon sa mga tawo nga nangguba sa mga koral ug paril daplin sa karsada sa dakbayan samtang P30,000 sa mga tawo nga makasakop sa akto ug makadakop.
Giawhag sa mayor ang tanan nga dili mahadlok sa pagtaho sa maong mga tawo ngadto sa mga awtoridad o sa iyang buhatan sanglit iyang gipasalig nga dili ibutyag ang ilang pagkatawo.
“Dugang sa akong padayon nga pagpaningkamot sa pagpanindot sa atong siyudad, buhaton nako ang tanan aron mahunong kining mga tawhana sa pagpangdaot sa atong siyudad,” matud niya.
Gitataw usab ni Chan nga iyang siguruon nga adunay mga pulis ug mga tanod sa barangay nga mopatrolya sa mga dapit nga sagad mahitabo ang bandalismo aron masiguro nga kini mahunong ug hingpit nga masumpo.
Nagtuo siya nga seguradong makadani sa lokal ug langyaw nga mga turista ang mga mural painting, ilabi na kon makita nila ang nindot ug mabulukon nga obra sa Mactan Artist Guild, usa ka grupo sa mga dibuhista nga pulos mga Oponganon ang dugo.
Iyang gisanglitan ang mural painting sa M.L. Quezon Avenue nga adunay tema sa kinaiyahan ug wildlife nga gitrabaho sa mga miyembro sa grupo.
“Timailhan usab kini kon unsa ka talento ug pagkamamugnaon ang mga Oponganon sa paggama og mga obra nga susama niining mga mural paintings ug uban pa,” matud pa niya, ug midugang nga kini adunay lainlaing mga tema nga magsilbi nga inspirasyon sa mga makakita niini.
Gihatagan usab og gibug-aton sa mayor kon unsa ka importante ang paghunong sa bandalismo sa dakbayan, nga nagtumbok sa mga mega project karong tuiga sama sa Mactan North Reclamation Development Project, pagtukod sa ikaupat nga taytayan sa Mactan, skyway project nga makahatag og solusyon sa problema sa trapiko sa dakbayan ug ingon man ang socialized housing sa Barangay Canjulao.