KATORSE anyos nga dalagita nga missing nianang Lunes sa buntag, Oktubre 14, napalgang patay ug gigulgol ang liog taliwa sa kakahuyan mga 50 metros ang gilay-on gikan sa ilang balay sa Purok Caimito, Barangay Guimbawian, lungsod sa Pinamungajan.
Dunay mga timailhan nga gilugos ang dalagita, apan gikinahanglan pa ang dugang paghiling sa doktor.
Ang pamilya ug mga kabanay sa biktima nga si Justine Andayop, 14, tinun-an sa grade 8 sa Lamac National High School, gisultihan sa albularyo nga ilang gidangpan nga gidagit og agta nga maldito ang ilang anak.
Matod ni Police Corporal Jonas Gonzales, imbestigador sa Pinamungajan Police Station, nagpadayon pa sila sa ilang imbestigasyon kon gilugos ba si Justine ug kinsa usab ang naghimo niini.
Ang lima ka magsuon ang naa sa balay nahabilin sanglit ang ilang mga ginikanan naa sa Carbon public market sa Dakbayan sa Sugbo nanindag mga utanon isip inadlaw nga panginabuhi.
Si Justine nga maoy kamaguwangan maoy nag-atiman sa iyang mga manghod.
Gitug-an sa manghod ni Justine nga nahinabi sa kapulisan sa Pinamungajan nga matag alas 4 sa kaadlawon, mounag mata ang ilang ate aron maoy modigamo para sa pamahaw ug bawon sa ilang pag-eskwela.
“Kining mga bataa sila ra nabilin sa balay kay ang ilang mama ug papa naninda man sa Carbon public market diha sa siyudad. Sila-sila ra gyud sa ilaha. Ingon pa sa manghod nga nangatulog ni sila kagabii, intact pa ni sila tanan. Naa pa iyang ate,” matod ni Gonzales.
Layo usab lakawon ang ilang eskwelahan gikan sa ilang balay hinungdan nga sayo mamangon ang mga bata aron makaandam og sayo sa bawon.
‘Gidagit sa Agta’
Niadtong Lunes sa kaadlawon, ilang nabantayan nga wa na ang ilang maguwang sa gihigdaan, apan wa lang panumbalinga tungod sa pagtuo nga mibangon na aron maghikay sa pamahaw.
Nihayag na lang, way namukaw kanila hinungdan nga nibangon ang manghod nga babaye, apan wa si Justine sa ilang kusina.
Gipangpukaw dayon sa igsuon ang uban pang mga manghod aron magpatabang sa pagpangita sa ilang maguwang.
Nagsige sila og panawag sa gawas sa ilang balay, apan wa nipatim-aw.
Tungod kay wa na nila makita ang ilang ate, niadto sila sa balay sa ilang mga iyaan ug paryente aron magpatabang sa pagpangita.
Wa nila makit-i si Justine.
Udto na lang, wa pa gihapon nila makit-i ang biktima.
Dinhi, nakahukom ang usa sa mga iyaan nga ipasubay nila sa albularyo sa ilang barangay sa pagtuo nga gibinoangan sila sa di ingon nato.
Duol sa ilang balay, dunay dakong punoan sa mangga, nga ilang gituohan diin gitagoan ang dalagita.
Nagsige sila og singgit nga “iuli ang bata!”
Giingong nakita sa albularyo nga gidala sa agta nga maldito ngadto sa mangga nga naa sa ilang tugkaran ang dalagita.
“Ang estorya kuno sa mananambal nga naibgan mao na ilang unang pagtuo gyud, unya gitagoan ni. Nag-ritual pa sila sa punoan sa mangga unya nag saba-saba sila nga iuli o ipagawas na ang bata,”dugang ni Gonzales.
Dinhi na nagpatabang sa mga barangay tanod ang mga kabanay aron lang makit-an si Justine.
Pagka alas 2 sa hapon sa Lunes, nakabantay ang mga tawo nga adunay gilangaw sa unahan sa balay.
Napalgan
Sa ilang pagsusi, patayng lawas sa usa ka tawo nga nag-ubo ang napalgan.
Sa pagtan-aw sa nawong, ila kining nailhan nga si Justine, kinsa aduna nay samad sa liog nga gituohan nga giabis og hait nga hinagiban.
Ang biktima gidala sa usa ka punerarya sa siyudad sa Sugbo aron ipaubos sa autopsy.
Si Bina Andayop, inahan ni Justine, sa pakighinabi sa Superbalita Cebu, nagkanayon nga aduna na silay gidudahan nga naghimo sa krimen.
Iya ra usab kini nga silingan sigun sa butyag sa kapulisan sanglit kadudahan kini gumikan sa paglayas niini sa ilang lugar.
“Nagduda man ni ani mao to gipaniiran sa akong bana kay sa tanan nga tawo sa amoa, siya ra man ang wala maanha sa amoa pagkakita sa lawas ni Justine. Nya ang estorya sa amoa nga niadtong Dominggo nagbaid sad kuno nag sundang unya pag human og baid sa sundang, nagtuyoktuyok kuno sa balay,” asoy ni Bina sa Superbalita Cebu.
Human mapalgi ang lawas ni Justine, ang silingan nga lalake giiingon daw sa natarantar, nagkadiin-diin nag panghuwam og kwarta aron molarga sa Manila.
Autopsy
Si Dr. Benjamin Lara, medico legal officer sa PNP Crima Laboratory, nipaubos na sa autopsy sa lawas sa biktima.
Nasuta nga naputol ang ubol-ubol gamit ang hait nga butang.
Gawas sa dakong samad sa liog, aduna usay nakita nga samad dinunggaban si Lara sa lawas ug samad usab sa dughan.
Matod niya nga dako ang posibilidad nga gilugos si Justine, apan dili pa siya sigurado sanglit wa pay resulta sa scientific examination.
“So, right now, kumoha tayo ng specimen. I’m not at liberty pa at this point to discuss my findings. Basta naay significant findings doon, sa genitalia ng bata. Basta kumuha tayo ng specimen para sa DNA examination,” matod ni Lara sa Superbalita Cebu.