HUMAN gipaubos na sa modified general community quarantine (MGCQ) ang Lalawigan sa Sugbo, gitugotan na sa lokal nga kagamhanan sa Dalaguete nga makabukas ang mga internet café, peso nets ug peso wifi, apan alang lang sa mga tawo nga adunay himuon nga trabaho.
Ang pagtugot pinasubay sa Executive Order No. 48 series of 2020 nga giluwatan ni Mayor Jeffrey Belciña niadtong Hulyo 8, 2020.
Giklaro sa mayor nga ang kadto lang mga internet cafe nga adunay mayor's permit o business permit ang maka-operate.
Subay sa maong kamandoan, kinahanglang mopatuman og 50 porsyento nga kapasidad ang matag establisemento ug mosunod gihapon sa curfew gikan sa alas 10 sa gabii hangtod alas 5 sa buntag.
Samtang alang sa mga tinun-an ug kadtong 21-anyos paubos, ingon man ang 60-anyos pataas, lakip na ang mga immunocompromised o adunay sakit, dili tugotan nga makasulod.
Kinahanglan usab nga kanunay nga mopahigayon og disinfection sa sulod sa di pa mangabli ingon man sa pagpanira ang mga cafe aron malikayan ang coronavirus disease (Covid-19).
Sa maong paagi, dili mokatap ang bisan unsa nga kagaw.
Ang mga internet shop nga mosuway pag operate nga way permit mamahimong sirad-an ug pasakaan og kaso ang tag-iya niini.
Aron masiguro kini, gitahasan sa mayor ang special team sa Covid-19 inspection team nga maoy mosusi sa mga barangay kon asa nahimutang ang mga internet cafe. (ANV)