Wala na mopakita o mi-absent without leave (Awol) ang duha ka mga polis sa dakbayan sa Sugbo nga nag positibo sa paggamit sa ilegal nga drugas atol sa gilusad nga kinalit nga drug test sa Abril 2023.
Matod ni Police Colonel Ireneo Dalogdog, hepe sa Cebu City Police Office (CPPO), human nigawas ang confirmatory test nga tiggamitan gyud sa ilegal nga drugas ang duha, gipaubos dayon kini sa administrative investigation.
Bisan pa kon wala na motunga ang duha ka police personnel, gipadayon lang gihapon ang dismissal proceedings sa Police Regional Office 7 tungod kay dili modupa ang kadagkoan sa kapulisan sa mga nalambigit sa ilegal nga drugas.
Ang duha mga sakop sa Station Drug Enforcement Unit (SDEU) apan wa gibutyag kon asa nga police station.
“Ongoing ang investigation nila. Gani wala na mo report siguro na discourage na tungod sa nahitabo sa ilaha. So mao ni ang strong message nga atong gipaabot sa kapulisan nga kita seryuso ta sa atong kampanya labi na sa ilegal nga drugas na mismo sa atong han-ay sa kapulisan, ato gyud paningkamotan nga wala gyuy mahaylo no nga nag apil-apil pa sa illegal drugs,” matod ni Dalogdog.
Sa Martes, Hunyo 20, 2023, laing 100 na usab ka mga polis nga nadestino sa station drug enforcement unit ang gipaubos sa kinalit nga drug test ug wala pa mogawas ang resulta.
Pasabot ni Dalogdog nga kabahin kini sa internal cleansing program sa Philippine National Police aron kadtong nalambigit sa paggamit sa ilegal nga drugas mataktak sa serbisyo.
Gitinguha ni Dalogdog nga ang kapin sa 1,000 ka mga police personnel sa Cebu City Police Office mapaubos sa drug test ug tangtangon sa serbisyo ang mamatud-an nga tiggamitan sa ilegal nga drugas.