Luwas ug makakita na ang dentista nga giatake ug gitusok ang iyang mga mata sa duha ka mga tawo sulod sa iyang klinika sa Queens Road, Brgy. Kamputhaw, dakbayan sa Sugbo, niadtong Hulyo 5, 2023, sa hapon.
Si Police Colonel Ireneo Dalogdog, hepe sa Cebu City Police Office (CCPO), nagkanayon nga si Dr. Charles Sia padayong giobserhan sa mga doktor human nahibalik ang panan-aw niini apan hanap pa.
Matod ni Dalogdog, padayon ang koordinasyon sa CCPO ug kang Sia ug ang paghatag sa seguridad niini samtang nagpaalim pa sa iyang mga samad agi sa pagbunal sa armas ug pagtusok sa mga mata sa biktima.
"Ang iyang physical condition is stable na, ang iyang duha ka mata makakita na... ok na gyud ang iyang sitwasyon," matod ni Dalogdog.
Hugot karon nga gi-monitor sa kapulisan ang duha ka mga suspek nga wa lang una niya nganli aron dili makalayas ug gipaabot na lang nila ang pag gawas sa warrant of arrest.
Niadtong Biyernes, Hulyo 7, 2023, gipasaka na ang kasong serious physical injury ug grave threats batok sa mga suspek nga gihulagway ni Dalogdog nga lig-on tungod sa mga ebidensiya nga ilang gihuptan.
Ang unang migawas nga kasayuran nga ang usa sa mga suspek giingong hinigugma sa babaye nga nakautang og dakong kantidad sa doktor nga iyang gipasakaan og kaso.
Ang suspek giingong nagtrabaho isip nurse sa usa ka tambalanan ug labihang sukoa sa dihang nasayod nga gikiha sa doktor ang iyang hinigugma.
