Ang chairman sa Board of Diretors (BODs) sa Metropolitan Cebu Water District (MCWD) nga si Atty. Jose Daluz III nihangop sa lakang ug suporta sa employees union sa mga pagsulay nga nagrumbo karon sa water district.
“Nagpasalamat ko’g dako sa atong mga empleyado, sa management nga aduna silay unity sa atong MCWD institution. Klaro na ang atong management, union and atong mga empleyado as a whole ug ang BOD nagkahiusa para sa kaayuhan nga atong mapadangat sa atong mga consumers,” padayag ni Daluz.
Iyang gihulagway nga ang maong resolution sa MCWD employees union dako og ikatabang pagresolbar sa kaso nga gisang-at batok kang Daluz ug ubang mga sakop sa BOD sa Office of the Visayas Ombudsman nga gisang-at sa kanhi mga opisyal sa union nga pulos wala na gisublian pagboto atol sa election sayo niining tuiga.
“It will also give peace to MCWD. Ang importante dinhi nga magmalinawon na ang MCWD aron maka-focus ta sa atong trabaho. I’m so happy nga nahitabo ning tanan and I hope that the mayor, he is a very understanding person, I think he will understand nga wala nay problema mayor,” dugang ni Daluz, kinsa buot pailisan ni Mayor Michael Rama.
Matod sa chairman sa BOD nga niining bahina, makatutok sa sila sa ilang trabaho pagpadaghan sa tubig sa water district ug ang mayor motutok usab sa pagserbisyo sa tibuok dakbayan.