Nagpadayon ang nagkadaiyang pakigpulong sa Kagamhanan sa Dakbayan sa Danao kauban ang mga opisyal sa Environmental and Sanitation Section, aron masugdan ang unang lakang sa pagkab-ot sa Zero Open Defecation (ZOD).
Gisugdan na niini ang pagpasabot ngadto sa mga lumolupyo sa Barangay Nangka sa siyudad kon unsa ang ZOD ug unsa ang kaayohan ug tumong sa maong programa. Gipasabot sa programa nga wala nay hugaw sa tawo nga makita sa kadalanan o open spaces sa komunidad.
Aron kini makab-ot, kinahanglan nga mogamit og pansayan o kasilyas ang mga tawo aron malikayan ang pagkatag sa mga hugaw sa tawo sa komunidad sa matag barangay.
Ang Sanitation Section nakahatag na og pasiunang 30 ka toilet bowls sa maong barangay niadtong Enero alang sa mga panimalay nga walay kasilyas.
Gipasiugdahan kini sa Department of Health (DOH) ug uban pang-ahensya sa gobiyerno, kauban ang pribadong sektor sama sa United Nations Children’s Fund (Unicef), World Bank-Water and Sanitation Program (WB-WSP), ug uban pa.