Nagplano si Cebu Governor Gwendolyn Garcia nga buhion ang nabantog nga dancing inmates sulod sa Cebu Provincial Detention and Rehabilitation Center (CPDRC).
Kini maoy gipahibalo ni Garcia atol sa pakighinabi sa mga tigbalita.
Gusto usab ibalik sa gobernador ang paagi sa savings account sa mga inmates. Gibuhat na kini sa milabayng termino ni Garcia, tuyo nga may magamit ang mga inmates atol sa pag gawas niini sa prisohan aron makasugod og bag-ong kinabuhi.
“I-revive nako tong savings nila, savings account duna silay passbook kada usa. They will have their savings accounts with the Cooperative Bank of Cebu,” matod ni Garcia kagahapon, Hulyo 7, 2022.
Aron makakwarta ang mga inmates, may community store kini nga makuhaan og kita nga mao usa’y kuhaan sa ilang pundo alang sa savings.
Sanglit ibalik na ang dancing inmates, nakighinabi na si Garcia sa renowned Cebuano dancesport instructor nga si Ed Hayco nga maoy motudlo sa inmates sa bag-ong mga sayaw.
“Although dancesports is more like ballroom dancing, pero tan-awon nato kay naa pa may inmates nga nahinumdum sa dance programs ug sa ilahang presentation sa una... Hopefully (this year mabalik ang Dancing Inmates) if ready na sila,” matud ni Garcia.
Nailhan ang dancing inmates sa 2007 nga nalakip sa listahan sa mga Most Popular Viral Videos sa maong tuig human nisayaw ang mga inmate sa sikat nga kanta ni anhing Michael Jackson nga ‘Thriller.’
Sentro usab sila sa nagkadaiyang mga documentay ingon man lokal ug international films.
Kahinumdoman nga gipahunong ang public viewing sa dancing inmates sa 2010 subay sa imbestigasyon nga gilusad sa Kapitolyo sa mga donations ug contributions nga nadawat sa grupo.
Uwahing nakita nga nisayaw ang inmates atol sa ‘Unity Dance’ nga gihimo sa Disyembre 2020 nga gipaluyohan sa National Commission for Culture and the Arts.
Sa kasamtangang ihap, anaa na lang sa 900 ka mga piniriso ang nahabilin sa CPDRC.