Davide, Magpale, kaubanan gikiha ni Gwen, Binghay

KONGRESISTA Gwendolyn Garcia ug Provicial Board Member Alex Binghay sa ika-tulong distrito sa lalawigan sa Sugbo misang-at og kasong civil ngadto sa Regional Trial Court sa Dakbayan sa Toledo batok sa mga opisyal sa Lalawigan sa Sugbo aron mahunong ang pagpatuman sa 20-ka-andana nga commercial building sulod sa Capitol compound nga ilang gihulagway nga “Torre ni Davide.”

Si Garcia midagan sa pagka-gobernador sa lalawigan sa Sugbo atbang ni Bise Gobernador Agnes Magpale.

Ang kasong injunction gisang-at niadtong Martes, Marso 25.

Ang gipangkiha mao ang Probinsya sa Sugbo, Gov. Hilario Davide III, Bise Gobernador Agnes Magpale, Provincial Administrator ug Bids and Award Committee Chairman Mark A. Tolentino, contractor nga WT Construction Inc. ug ang Development Bank of the Philippines (DBP).

Matod ni Pablo John Garcia, usa sa mga abogado ni Gwen, si Davide nakalapas sa Section 22 sa Republic Act no. 7260 kun Local Government Code of 1991.

Ang balaud nagmando nga way kontrata nga sudlan ang usa ka local chief executive kon walay pagtugot sa sanggunian.

Gipasabot ni Garcia nga tinuod nga adunay gipalabang nga resolusyon ang Hunta Probinsyal nga nagtugot sa gobernador nga maka-pirma og kasabotan alang sa pagpangutang sa DBP.

Apan lahi ang resolusyon nga nagtugot sa gobernador aron mopirma alang na sa deed of assignment with hold-out.

Laing kalapasan nga nahimo ni Davide ang giingong pagsulod og kontrata tali sa kontraktor, WT Construction, bisan kon way pagtugot sa Hunta Probinsyal.

Gani, si Tolentino mipadala og suwat hangyo ngadto sa Hunta Probinsyal niadtong Enero 14 aron mahatagan sila og resolusyon nga naghatag og katungod sa gobernador.

Apan human sila nakabantay nga di sila makakuha sa ilang hangyo, si Davide nibakwi sa suwat ug niingon nga wa na kinahanglana pa ang pagtugot sa Hunta Probinsyal base usab sa desisyon sa Korte Suprema sanglit ang maong proyekto nabutang na ang detalye sa ilang gipalabang nga supplemental budget no.1.

Sila natinga tungod sa makadaghan, ang gobernador kanunay mang mangayo og pagtugot sa Hunta Probinsyal sa matag proyekto.

Laing basehanan sa ilang reklamo mao nga ang bidding pag-award alang sa proyekto illegal tungod kay kuwang og tinubdan kon asa kuhaon ang pundo sa proyekto.

Nakalapas usab kini sa Republic Act no.9184 kun Government Procurement Reform Act.

Gawas nga illegal, ila usab gihulagway nga anomaluso tungod kay ipatuman ang proyekto sulod sa 790 ka adlaw nga sundon sa mosunod nga gobernador, apan ang naglingkod kutob na lang sa Hunyo 30.

Kini wa pay labot sa paglapas sa National Cultural Heritage Act. Of 2009, nga way pagtugot gikan sa National Historical Commission of the Philippines.

Matod ni Cong. Garcia nga ang administrasyong Davide naghimog proyekto nga mangutang ang Lalawigan ug magtukod og taas nga edepisyo dinhi sa dakbayan sa Sugbo nga way gamit alang sa katawhan sa probinsya.

Nagkanayon siya nga mogasto og dakong kantidad samtang ang katawhan sa probinsya way nakitang kaayohan alang kanila ug nahikawan sa maayong serbisyo sa administrasyo Davide.

“Ask forgiveness from Cebuanos for insulting their feelings and intelligence,” nagkanayon ang kongresista.

KORTE RA

Si Davide, sa iyang bahin, niingon nga ang korte ray makapahunong sa construction sa building.

Matod ni Davide nga ang Probinsya nisunod sa balaud, nisubay og maayo sa rules sa Government Procurement Act.

“We are prepared to defend the project. Of course we know them. Mao mani sila hilig kaayo og broka, kanang file file dayon og kaso. Pero sige lang, preparado man ta motubag ana,” nagkanayon si Davide.

Matod sa gobernador nga mahinungdanon ang proyekto.

Gitun-an kini og maayo sa Lalawigan, di sama kanila ni Garcia nga nanghimog mga proyekto aron makakuwarta sama sa Cebu International Convention Center (CICC), apan nabaligya sa Kapitolyo og P300 million, matod ni Davide.

Sa alegasyon nga gipasagdan sa Probinsya ang mga road project ni Garcia, si Davide niingon nga “natural nanguba because nipis man kaayo ang aspalto niya.Very poorly executed.”

“Tell Garcia, manghambog siya sa mga roads niya, pwerteng nipisa. Kinsa may nag ayo ana ron? Ang Province. Cemento nang ato, 12 inches thick,” nagkanayon si Davide. (dugang taho ni MVG)