Emusyonal nga niatubang sa mga tigbalita si Atty. Reymelio Delute human siya gipasanginlan ni Mayor Tomas Osmeña nga “nangilkil” sa mga sidewalk vendors.
Ang pasangil gisalikway ni Delute gani siya pa ang nitabang sa vendors aron masulbad ang ilang mga problema kay kaniadto mga tigpaluyo sila sa nilabay nga administrasyon.
“Wa ako mangilkil sa mga vendors. Nia man gani ni ang mga vendors ako man gani ni sila giingnan nga basin makulban mos kaldero kon lutoson mo sa City Hall,” padayag ni Delute.
Gipahibawo sa manlalaban nga dili siya makapugos kang Osmeña kon dili na siya ilhon nga kaabin sa Bando Osmeña Pundok Kauswagan apan ang dili niya madawat mao ang pasangil nga wala niya mabuhat.
“Nahimo nakong adbokasiya ang paglaban sa mga dinaogdaog dili ug dili kana tinuod mao nang pagkabasa nako sa news nga gisalikway nakong Tommy nadawat ko na kay iya manang katungod ako nang girespitohan,” matod ni Delute.
“Giisip ko siyang amahan sa BOPK, giidolo ko siya, gihangop ko ang iyang vision sa mga Sugbuanon mao nang nikuyog ko sa iyang pulitikanhong pagserbisyo, apan nasagmuyo ug naguol ko sa iyang gihimo nako ug wa nako damha bisan sa damgo nalang nga makahimo siya kanako nianang (pasangil),” dugang ni Delute.
Usa sa saksi sa kamaayong tawo ni Delute mao ang kanhi kapitan ug kagawad sa barangay Sumon sa lungsod sa Tuburan nga nituyo og anhi sa Sugbo aron panalipdan ang kanhi konsehal sa ilang lungsod nga si Delute.
“Siya ang nanalipod sa akong kaso, siya ang nagtabang ug walay bisan piso nga gipangayo sa iyang pagtabang aron makagawas ko sa akong problema. Tab-ang kaayo ang mga pasangil para sa among pinalanggang Atty. Delute,” testimoniya ni Norma Borlas.
Gitumbok ni Delute nga si Francisco “Bimbo” Fernandez, executive assistant ni Osmeña ang nagpasangil kaniya kay iyang gihulagway kay nanginlabot siya sa vendors.
Gisuwayan og tawag sa Superbalita Cebu si Fernandez apan way nitubag sa iyang cellphone.
Si Delute nagkanayon nga nitabang siya sa mga vendors aron usab iyang tabangan siya sa iyang pulitikanhong tumong diin siya magpapili pagkakapitan sa barangay Basak San Nicolas karong Mayo 14. (PAC)