Opisyal sa Department of Education (DepEd) nga si ARD Cristito Eco (nagsul-ob og puti nga polo) ug Kristian Pondar sa CMT I ang misusi sa usa ka unit sa laptop nga napalit gikan sa surplus shop.
Tuyo nga gidala sa buhatan sa SunStar Publishing ang usa ka unit sa maong laptop aron kini mapakita human nibuto ang maong taho sa SunStar Cebu sa miaging semana.
Sa sayo pa, ang DepEd 7 nimando og pagsusi ngadto sa usa ka surplus shop sa Mandaue City nga giingong namaligya og laptop nga custom-built alang sa mga magtutudlo sa public schools.
Buot masayran sa DepEd kon unsang hitaboa nga naabot ngadto sa HMR Cebu branch nga nahimutang sa Mandaue City ang maong mga unit.
Tungod niini si DepEd 7 Director Salustiano Jimenez nimando sa tanang division superintendents sa pagsusi kon adunay mga laptops nga gihatag gikan sa DepEd 7 nga nangawala.
“Kon dinaghan ang ilang baligya, then there is a possibility nga kinawat siya sa warehouse sa DepEd o mga excess siya sa supplier ug gibaligya na lang,” matod pa ni Jimenez. (FVQ, SunStar Cebu hulagway ni Amper Campaña)