MANAWAT og mga proposal ang Metropolitan Cebu Water District (MCWD) alang sa desalination sa tubig gikan sa dagat alang sa tibuok isla sa Mactan.
Si Charmaine Rodriguez-Kara, tigpamaba sa MCWD, nibutyag nga duna nay usa ka kompaniya ang nakaduso sa ilang tanyag, apan wa lang una niya kini nganli.
Nagsugod sila og dawat og proposal niadtong ikaduhang quarter ning tuiga.
Ang desalination mao ang proseso sa pagkuha sa asin gikan tubig sa dagat nga ipaubos sa treatment aron kini mainom.
Matod niya, gilantaw sa MCWD nga ugma damlag dili na magsalig sa tubig gikan sa mainland Cebu ang tibuok Mactan Island.
“Gitan-aw gyud nato ma-independent gyud siya,” dugang ni Kara dihang nahinabi sa Superbalita Cebu.
Sigon niini nga sa karon ang gihatod nga tubig sa dakbayan sa Lapu-Lapu ug lungsod sa Cordova kay gikan sa mainland o ang supply sa tubig nga gikan sa lungsod sa Carmen, Cebu Manila Water Development (CMWD), siyudad sa Danao ug ubang tinubdan sa tubig diin dunay kasabotan ang MCWD.
Ilang gitugyan ngadto sa proponent kon pila ang volume sa tubig nga ma-desalinate niini matag adlaw alang sa isla.
Siya nidugang moabot sa 90,000 cubic meters ang demand nga tubig sa Mactan Island matag adlaw hangtod sa 2017 ug nagkasaka kini pag-abot sa 2018.
Apan 21,000 cubic meters lang ang ilang ma-supply nga tubig matag adlaw ngadto sa mga konsumedor sa maong isla.