Ipailawom sa background investigation ang mga polis nga mosulod sa Drug Enforcement Unit (DEU) sa Cebu City Police Office (CCPO).
Gawas pa niini, ipailawom usab sa kinalit nga drug test ang tanang mga sakop niini karon.
Mao kini ang mga lakang nga pagahimuon ni Police Colonel Ireneo Dalogdog, direktor sa CCPO, human nimando sa kapulisan sa nasod si Philippine National Police (PNP) Chief General Benjamin Acorda, Jr., nga subling ipaubos sa screening ang mga personnel sa mga DEU sa matag police office ug station aron paglimpyo sa hut-ong sa kapulisan lukop nasod.
Kini kabahin sa gipatuman ni Acorda nga internal cleansing sa ilang hut-ong human madiskobrehi nga dunay mga polis nga nalambigit sa pagpayuhot og illegal drugs sa nasod dihang nasakmit sa kagamhanan ang 1.3 toneladang shabu niadtong Oktubre sa buy-bust sa Manila.
Si Dalogdog nihangop sa kamandoan ni Acorda aron masusi kinsa kining nalambigit sa ilegal nga kalihukan.
Dugang ni Dalogdog nga mohimo usab sila og evaluation sa mga police personnel nga mosulod sa DEU aron maseguro nga limpyo og record ang masulod.
Wa hinuoy himuong lahugay sa mga personnel sa DEU sanglit nagkinahanglan man kini og taas nga proseso gumikan kay ipaubos sa training ang mga personnel nga madestino sa maong unit.
Sila ipaubos kanila sa kinalit nga drug test ug kon dunay magpositibo sa paggamit sa ilegal nga drugas, iya dayong ipatangtang.
“Kining atong mga station Drug Enforcement Unit tsaka City Drug Enforcement Unit, ato na silang i-surprise drug test, para pag mag positive sila ato dayon na sila i-relieved diretso sa ilang present assignment,” matod ni Dalogdog.