“BAWAL ang mag-selfie,” pahimangno ni P/SSupt. Limuel Obon ngadto sa publiko nga mosaksi sa Regent Aguila Energy Drink Ironman 70.3 Philippines Asia-Pacific karong adlawng Dominggo.
Samtang heightened alert ipatuman sa kalihokan.
Iyang gitataw nga gi-discourage ang mga spectator nga mag-selfie diha mismo sa agianan sa bike route ilabi na niadtong nagpadung nga celebrity bikers nga moagi sa ilang tungod.
“We will discourage anang selfie - selfie, (bike) race gud ni. Isang kurap lang naa na dinha,” pasabot ni Obon ngadto sa mga tigbalita.
Base sa nangaging Ironman sa Lapu-Lapu di kalikayan sa mga manan-aw nga magdali-dali og kuha sa ilang hulagway sa higayon nga nagkaduol na ang ilang celebrity idols nga misalmot sa lumba ug mopuwesto pa sa karsada.
Matod pa sa opisyal nga di lang ang kaluwasan sa atleta ang ilang gipanalipdan lakip na sa mga mananan-aw nga madasmagan unya sa mga atleta.
“These are not ordinary bikers, they came from far far away just to join this one,” dason sa city director.
Laing pahibawo ni Obon nga di nila tugotan ang mga maman-aw nga mosaka sa first bridge nga nalakip sa rota sa bike race lahos sa Mandaue City vice versa for security reason.
Gi-discourage sab ang publiko nga magdala og back packs aron di mahasol sa security checks niadtong mga police detail ug non-uniform personnel nga maglibot sa rota ilabi na nga ipaubos sa heightened alert ang Lapu-Lapu atol sa maong adlaw.
Gawas sa PNP personnel sa Lapu-Lapu City adunay gibana-bana nga 500 ka augmentation force gikan sa Police Regional Office nga moabag sa seguridad sa international sports event. FVQ