BISE mayor sa lungsod sa Tuburan midonar og lima ka hektarya nga yuta ngadto sa Philippine National Police nga butangan sa bag-ong training center sa mga pulis sa Central Visayas.
Matod ni Bise Mayor Aljun Diamante nga nagpadayon na ang paglihok sa mga papeles aron pormal na nga mabalhin ang ngan sa luna ngadto sa PNP.
"Hopefully by next week or months to come, mahuman na nang pagproseso sa mga dokumento aron makasugod na sa pagtukod sa training school," nagkanayon si Diamante sa pakighinabi sa Superbalita Cebu.
Dugang ni Diamante nga ang luna naa sa Barangay Mag-alwa, lungsod sa Tuburan, mga 17 kilometros gikan sa kinapusoran.
"Gikan didto Barangay Kabangkalan kon asa ta nagtanom og mga kahoy, mga anaa pa sa 5 kilometro ang kalay-on nalang niya," nagkanayon si Diamante atol sa iyang pagkuyog sa tree planting sa Cebu Police Provincial Office (CPPO) sa Huwebes, Pebrero 4, 2021.
Samtang dungan sa tree planting activities sa PNP ug lokal nga kagamhanan sa Tuburan, nihatag usab ang kapulisan ug si Mayor Danilo Diamante og usa ka balay sa usa ka pamilya nga nawad-an og kapuy-an tungod sa baha niadtong Disyembre.
Ang lungsod nakasinati og grabeng pagbaha niadtong Disyembre nga niguba og pipila ka mga balay.
Si Police Lieutenant Colonel Rolando Baraquio sa pakighinabi sa Superbalita Cebu nibutyag nga nigasto sila og P60,000 alang sa magtiayong Joleser, 34, ug Robelyn Cebuano, 35. Ang magtiayon dunay lima ka mga anak.
Tipik kini sa ilang Kapwa Ko, Sagot Ko project sa PNP nga maoy gimando ni General Debold Sinas.
Gawas kang Mayor Diamante, nitambong usab si CPPO Director Colonel Aladdin Collado ug ubang officials.
Matod ni Baraquiro nga ikatulo na kini nga balay nga ilang napatukod.
Si Robelyn, sa iyang mensahe atol sa mubo nga programa, nipasalamat kanila ni Diamante, Collado ug uban pa nga duna na silay kapuy-an.
Matod niya nga ang ilang tanang mga butang gibanlas sa baha, gawas sa imahen ni Sr. Santo NiƱo nga wa matandog gikan sa ilang gibutangan niini.